مه‌سروور بارزانى: داعش‌ ل سه‌ر هه‌رێمێ و ئیراقێ گه‌فه‌كا به‌رده‌وامه

سه‌رۆكوه‌زیرێن هه‌رێما كوردستانێ راگه‌هاند، رێكخستنا تیرۆرستییا داعشێ گه‌فه‌كا به‌رده‌وامه‌ بۆ سه‌ر ئیراقێ و ده‌ڤه‌رێ.

مه‌سروور بارزانى، سه‌رۆكوه‌زیرێن هه‌رێما كوردستانێ بۆ رۆژناما شه‌رقولئه‌وسه‌ت راگه‌هاند، رێكخستنا تیرۆرستییا داعشێ گه‌فه‌كا به‌رده‌وامه‌ بۆ سه‌ر ئیراقێ و ده‌ڤه‌رێ.

دۆپات ژى كر، ئیراق و هه‌رێما كوردستانێ هێشتا پێدڤى ب هه‌بوونا هێزێن هه‌ڤپه‌یمانییا ناڤده‌وله‌تى هه‌یه‌ بۆ شكاندنا ئیكجارى یا وێ رێكخستنێ.

ده‌رباره‌ى دانپێدانا گرۆپێ تیرۆرستى یێ داعشێ كو به‌رى چه‌ند رۆژان ژلایێ جڤاتا ئاساییشا هه‌رێمێ ڤه‌ هاتیه‌ به‌لاڤكرن گۆت: شانێن نڤستى یێن داعشێ ل كه‌مپا هۆل یا سووریێ پلان بۆ ئارمانجگرتنا هه‌رێما كوردستانێ ئاماده‌كربوو.

پێشتر ژى ل گه‌را سێیێ یا گۆتۆبێژێن ستراتیجى د ناڤبه‌را به‌غدا و واشنتۆن دا مه‌سروور بارزانى راگه‌هاندبوو، پێدڤییه‌ شاندێ ئیراقێ ئه‌وێ چه‌ندێ ل به‌رچاڤ بگریت كو هه‌رێما كوردستانێ بریارا خوه‌ هه‌یه‌ و پێدڤییه‌ هێزێن هه‌ڤپه‌یمانییا ناڤده‌وله‌تى ل ئیراقێ بمینن.