مه‌سرور بارزانی: ئاشكرایه‌ هێرشێن ڤان داوییان بۆ تێکدانا ئاسایشا مەیه‌

سەرۆکێ حکومه‌تا هەرێما کوردستانێ مەسرور بارزانی، ل پەیامەکێ دا دەربارەی هێرشا تیرۆریستی یا ئەڤ شەڤە بۆ سەر فڕۆکخانەیا نێڤدەولەتی یا هەولێرێ راگه‌هاند: ب تۆندترین شێوە ئیدانەیا هێرشا تیرۆریستی یا ئەڤ شەڤە یا سەر فڕۆکخانەیا نێڤدەولەتی یا هەولێرێ و بنگەیێن سەربازی یێ تورکیا ل باشیک و ئەو گرووپێن تیروریستی یێن ل پشت ڤی کارەی دکەم. هێرشێن ئەڤان داوییان گەلەک دیار و د ئاشکەرانە بۆ تێکدانا ئارامییا ئاسایشا مە و هەماهەنگییا مە دگەل هەڤپەیمانێن نێڤدەولەتی.

مه‌سرور بارزانی گۆتییه‌ ژی، هەر گرووپەکا چەکدار د چوارچۆڤێ هێزێن ئەمنی یێن فەرمی یێن ئیراقێ نەبیت، دڤێت دەستبجێ خوه‌ ل سنوورێن هەرێما کوردستانێ ڤەکێشن، د ڕۆژێن داهاتی دا ئەز دێ دگەل هەڤبەشێن مە ل ئیراقێ و کۆمەلگەها نێڤدەولەتی دێ دانوستاندنان ل سەر رێکارێن بجهـئینانا ئەڤێ پێنگاڤێ کەم.

هه‌روه‌سا گۆتییه‌، ئەڤ شەڤە ئه‌ز دگەل سەرۆک وەزیران مستەفا کازمی و سەرۆکێ پەرلەمانێ ئیراقێ محەمەد حەلبوسی ئاخڤتم، بۆ جەختکرن و دووپاتکرنا هەماهەنگیێن دەربارەی ئارمانجێن هەڤبەشێن مە بۆ لێپرسینا وان گڕۆپێن نە یاسایی. خەڵکێ هەرێما کوردستانێ پشت راست دکەمەڤە کو ئەندامێن تیرۆریستی یێن ل پشت هێرشا ئەڤ شەڤە دێ باجا ڤان کریاران دەن.