ساخله‌مییا دهۆکێ: ل 21 جهێن جودا پشكنینێن كۆرۆنایێ دهێنه‌ كرن

چه‌ند رۆژه‌كه‌ پترین هه‌ژمارا تووشبووێن ڤایرۆسێ كۆرۆنایێ و مرنێ ب وى ئه‌گه‌رى ل سه‌ر ئاستێ هه‌رێما كوردستانێ ل پارێزگه‌ها دهۆكێ یه‌، په‌یڤدارێ ساخله‌مییا پارێزگه‌هێ ژى دبێژیت، 37 تووشبوو بارێ ساخله‌مییا وان نه‌ جێگیره‌. 

 بەرپرسێ راگەهاندنا ساخله‌مییا دهۆکێ بۆ خانى نیوز راگه‌هاند، پترییا تووشبوونێن كۆرۆنایێ ل سنۆرێ پارێزگه‌ها دهۆكێ نه‌، ئه‌و ژى بۆ چه‌ند ئه‌گه‌ران ڤه‌دگه‌ریت، ژ وان ژى كێمییا پێگیرییا وه‌لاتییان ب رێكارێن خوه‌پاراستنێ د چه‌ند حه‌فتیێن بووری دا، نها 83 تووشبووێن كۆرۆنایێ د نه‌خۆشخانێ ڤه د نڤاندینه‌ و 13 تووشبوو ژ وان ل ژێر ئامیرێ هه‌ناسه‌دانێ نه‌.‌

حەمزە رەزیکی گۆت ژى: ل سنۆری پارێزگه‌ها دهۆکێ پشکنین زێده‌بوونه‌، به‌رى نها پشكنین د جهه‌كى ب تنێ دهاتنه‌ كرن، به‌لێ نوكه‌ 21 جهێن جودا ل دهۆكێ پشكنینێن كۆرۆنایێ دهێنه‌ كرن و هه‌ژمارا سه‌ره‌دانێن وه‌لاتییان بۆ پشكنینان بلند بوویه‌، بۆ نموونه‌ ل 20 نیسانێ دوهزار و 435 پشكنین بوون، و 21 نیسانێ دوهزار و 964 پشكنین بوون و ئه‌ڤرۆ 22 نیسانێ سێ هزار و 353 پشكنین ل سنۆرێ پارێزگه‌ها دهۆكێ هاتینه‌ كرن.

بەرپرسێ راگەهاندنا ساخله‌مییا دهۆکێ دیار كر، چه‌ندین رۆژه‌ پێگیرییا وه‌لاتییان ب رێكارێن خوه‌پاراستنێ به‌راوردى دگه‌ل به‌رى نوكه‌ باشتر بوویه‌، ئامار و پێشبینى وه‌سا دده‌نه‌ دیار كرن كو دبیت هه‌ژمارا تووشبوویێن كۆرۆنایێ هه‌تا هه‌یڤا پێنج ل پارێزگه‌هێ هه‌ر ب بلندى بمینیت.