پارێزگارێ دهۆکێ پێشوازی ل شاندەکێ دبلۆماسی یێ ئسپانیا كر و پهیوهندیێن دوقۆلى گۆتوبێژكرن و بریارا ڤهكرنا سهنتهرێ دانا ڤێزا ئسپانى ل دهۆكێ دا.
د. عهلى تهتهر ئهڤرۆ پێشوازى ل ئەرنستو دی لاورنتیس و فرانسیسکو گورباچو، نوونەر و بەرپرسێن ئۆفیسا ئسپانیا ل هەولێرێ و و فاخر گراڤی، رێکخەرێ پەیوەندیێن هەرێما کوردستانێ و ئسپانیا و عەبدولرەحمان کەمەکی، رێڤەبەرێ سەنتەرێ ڤیزا ئسپانی ل هەرێما کوردستانێ و عیراقێ کر.
شاندێ ئسپانى سوپاسیا پێشوازیا گەرما پارێزگارێ دهۆکێ کر و راگەهاند، ب مخابنى ڤه هەتا نها کونسلخانە و نوونەراتیەکا بەرفرەهـ ل هەرێما کوردستانێ نینە و ئەو هیڤیدارن پەیوەندیێن هەردو وەلاتان بەر ب پێشڤەبچن و بەرفرەهتر لێ بهێن.
شاندێ ئسپانى ئاشكرا كر، دبەرنامێ وان دایە زێدەتر هاریکاریێن مرۆڤایەتی پێشکێشی هەرێما کوردستانێ بکەن و گۆت: ئهو دێ سەنتەرەکێ پیدانا ڤیزا ئسپانی ل دهۆکێ ڤەکەن.
ژ ئالیێ خوهڤه د. عهلى تهتهر، پارێزگارێ دهۆکێ سوپاسیا هاتنا شاندێ ئسپانی کر و راگەهاند، هەرێما کوردستانێ و وەلاتێ ئسپانیا پەیوەندیێن وان د ئاسایی و بەردەوامن هیڤى ژى خواستن ئهو پهیوهندى د ئاستێ دبلۆماسی دا بەر ب پێش بچن و ڤەکرنا سەنتەرێ پێدانا ڤیزا ئسپانی ل پارێزگەها دهۆکێ گاڤەکا گرنک و جهێ سوپاسی و دەستخۆشیێ یە.
د. عهلى تهتهر گۆت ژى: نە بتنێ د ئاستێ هاریکاریێن مرۆڤایەتی دا، بەلکو د ئاستێ گەشتوگوازێ و پیشەسازی و چاندن و خواندنا بلند دا دێ گەلەک مفایی ژ ئەزموونا ئسپانیا بینن و داخواز كر ئاسانکاریان بۆ وهلاتیێن هەرێما کوردستانێ و پارێزگەها دهۆکێ بکەن و دەرگەهـ بو دوستێن وان یێن ئسپانی دڤەکرینە.
