ئەمیندارێ گشتیێ وەزارەتا پێشمەرگەی راگەھاند، شەڤا بووری کۆمبوونەکا تایبەت ل دۆر گەف و ترسێن رێکخستنا تیرۆرستییا داعشێ ب سەرپەرشتییا سەرۆکوەزیرێن ئیراقێ ل بەغدا ھاتە کرن و بریارا ھاتە دان ڤالاتیێن ئێمناھیێ ب ھەڤپشکی بھێنە پڕکرن. جەبار یاوەر د ھەژمارا خوە یا تایبەت دا ل سەر تۆرا جڤاکی یا فەیسبووکی راگەھاند، ئەو د گەل فەریق جەمال ئێمینکی، سەرۆکئەرکانێ وەزارەتا پێشمەرگەی پشکداری کۆمبوونەکا بەرفرەھـ یا سەربازی و ئەمنی بوون کو ب سەرپەرشتییا مستەفا کازمی، سەرۆکوەزیرێن ئیراقێ و ب بەرھەڤییا وەزیرێن بەرگریێ و ناڤخوە و دارایی یێن حکومەتا فیدرال ھاتیە کرن. یاوەر گۆت ژی: کۆمبوون یا تایبەت بوو ب گەف و ترسێن داعشێ کو ل دەمێن بووری ژبەر ڤالاتییا ئەمنی و سەربازی ھاتینە کرن و بووینە ئەگەرێ شەھیدبوونا چەندین پێشمەرگە و سەربازێن سوپایێ ئیراقێ. ئەمیندارێ گشتیێ وەزارەتا پێشمەرگەی ئاشکرا ژی کر، د وێ کۆمبوونێ دا بریار ھاتە دان چالاکی و ھەماھەنگی و کارێن ھەڤپشک د ناڤبەرا پێشمەرگەی و سوپالیێ ئیراقێ دا زێدەتر لێ بھێن و وان ڤالاتیێن ئەمنی پڕ بکەن و ئالۆگۆریا زانیاریێن ھەوالگیری بکەن دا رێ ل وان کارێن تیرۆرستی بگرن.
