پشتی شڤێدی شەرەکێ دژوار ل دەردورێن گۆندێ کێستە ل دەڤەرا بەرواری بالا د ناڤبەرا گەریلایێن پەکەکێ و تورکیا دا دروست بووی، مەترسی ل سەر ژیانا خەلکێ کێستە پەیدا بوو و ب ڤێ سەدەمێ ژی گوند هاتە چوولکرن و ئاکنجیێن گوندی ژی ئاوارەنە و رەوشا وان خرابە.
محمود کێستەی، موختارێ گوندێ کێستە تایبەت بۆ خانی نیوز گۆت، تا نها چ هاریکاریەک نەگەهشتیە خەلکێ گوندێ وان، لێ بریارە سوبە دەزگەهێ خێرخوازیێ بارزانی هاریکاریێن مرۆڤی بگەهیننە دەستێ ئاواران.
دەربارەی زیانێن شەرێ شڤێدی دەربازبووی ل سەر گوندى موختاری گۆت، زێدەترێ 600 مێشێن هنگڤینی ژناڤ چووینە زێدەباری سۆتن و ژناڤچوونا رەز و بیستانێن گوندی.
گۆت ژی، نها چ کەسەک و ئاژەلدارەک د ناڤا گوندی دا نەمایە، ئەڤرۆ رێڤەبەرێ ناحیا کانی ماسێ و بەرپرسێ لیژنا پارتی ل وێ دەڤەرێ سەرەدانا وان کریە، وان زیانێن خوە ب راپورتەکێ ئاراستەی حکومەتا هەرێما کوردستانێ و نهتهوهیێن ئێكگرتى کرینە.
