عەمید روکن مەسعوود زاخۆیی، شیرهتكارێ لەشکەری ل وەزارەتا بەرگرییا ئێراقێ دهەڤدیتنەکا تایبەت دا بۆ خانی نیوز دیارکر، لەشکەرێ تورکیا گوپیتکا زنارا کێستە یێ دکەڤیتە سنورێ ناحیا کانی ماسێ كۆنترۆل كرییه و ب چ رەنگا نابیت بێ دەستوریا ئێراقێ وى جهى كۆنترۆل بكهت، ژبهركو بنپێکرنا سەروەریا دەولەتا ئێراقێ یه و چ رێكکەفتن نەهاتینەکرن هەتا لەشکەرێ تورکیا بنگههێن خوە ل وێرێ و هەرجهەکێ دی ژ ئاخا ئێراقێ وهەرێمێ دانیت.
ل دۆر گرنگیا زنارا کێستە، عەمید روکن مەسعوود زاخۆیی گۆت: ل گۆرهى زانستێ سەربازی زنارا کێستە گەلەک بلندە و ئاسێ یه و تورکیا بۆ خوە ب گرنگ دیتیە و بنگههێن خوە لێ بنەجهـ کرینە و ل قۆناغا دویێ لەشکەرێ تورکیا دشێت خالێن نوی دانیت و ب رێکا لەشکەرى زنارا کێستە دێ چاڤدێریا خالێن خوە کەن.
شیرهتكارێ لەشکەری گۆت ژى: لەشکەرێ تورکیا ب وێ بلنداهیا ستراتیژی دێ شێت کۆنترۆلا پتریا دەڤەرا پارێزگەها دهۆک کەت، ب تایبەت چیایێن مەتین و گارە ژبلی دەڤەرێن سنۆری ل دەرکار و باتیفا و کانی ماسێ بۆ دیتنا لڤینێن پەکەکێ.
عەمید مەسعودی ل دۆر هەبوونا خالێن پاسەوانێن سنۆری و پێشمەرگەی گۆت: پێدڤییە خالێن وان هزر د هندێ دا بهێتە کرن ل دوماهییا سنۆری خالێن سفر بهێنە دانان ژبەر کو ب هەبوون و دانانا خالێن سفر تورکیا ئێدی نەشێت سنۆران ببەزینت .
هەتا نها نێزیکی 20 خالێن لەشکەرێ تورکیا یێن نوی ل سنۆرێن زاخۆ و ئامێدیێ داناینە و ژ ئەگەرێ شەر و پەڤچوونێن د ناڤبەرا تورکیا و پەکەکێ دا نێزیکی (٣٠٠) گوندان هاتینە چوولکرن و زیانێن مەزن یێن گیانى و زیانێن مەزن ب ئاقارێن دێمی و ئاڤی یێن کوردستانێ کەفتینە.
