ل گۆر مالپەرا فەرمییا سەرۆک بارزانی داخویانی وه‌ھایە:
ب ناڤێ خوەدایێ مەزن و دلۆڤان
ب ھەلکەفتا ھەفتێ و پێنجەمین سالڤەگەرا دامەزراندنا پارتیا دەمۆکراتا کوردستانێ دە، گەرمترین پیرۆزباھیێن خوە پێشکێشی ھەموو کادیر و ئەندام و ئالیگرێن پارتی دکم. پیرۆزباھیێ ل مالباتێن سەربلندێن شەھیدان و پێشمەرگەیێن قەھرەمان و ھەموو چین و پێکھاتێن کوردستانێ دکم و ھێڤیا سەربلندی و خوەشیێ ژ بۆ وان دخوازم.
دامەزراندنا پارتی ل شانزدەھێ تەباخا ١٩٤٦ دا زەروورەتەکە دیرۆکی بوو ژ بۆ بەردەوامیا خەبات و بەرخوەدانا گەلێ کورد ل وێ دەمێن کو نەیار و داگیرکەرێن کوردستانێ ب ھەموو ھێز و شیانێن خوە ڤە ھەولا نەھشتنا شۆرەش و سەرھلدانا گەلێ کورد ددان. پارتی ھەر ل دەستپێکا دامەزراندنێ ڤە ھەتا نھا ئامرازەک بویە ژ بۆ پێکانینا ئارمانجا دەمۆکراتی و نشتیمانی و نەتەوەییێن گەلێ کوردستانێ و ل ھەمان دەمێ دە ژی مل ب مل ل گەل ھێزێن تێکۆشەر و نشتمانپەروەرێن دن یێن کوردستانێ ئامرازێن بەرگریکرنێ بویە ل ماف و ناسنامەیا گەلێ کوردستانه یا ل ھەموو قۆناخان دا.
خەباتا پارتی فاکتەرێ گرنگ و ب باندۆر ل دیرۆکا خەبات و بەرخوەدانا گەلێ کوردستانێ دە پرە ل ئەڤراز و نشێڤی و پارتی بەشدارەکە سەرەکی ل سەرکەفتن و دەستکەفتان بویە و ل قۆناخێن دژوار دا ھەردەم خوە ب بەرپرس زانیە. ل ھەموو قۆناخان دا پارتی وەکی ئامرازەک بویە ل دەستێ گەلێ کوردستانێ دە ژ بۆ مسۆگەرکرنا ماف و دەستکەفتان و کوورترکرنا پرالی و برایەتی و پێکڤەژیانێ و رۆلا خوەیا پێشەنگ ل ھەموو وارێن ژیانا سیاسیا کوردستانێ دە پاراستیە.
دامەزراندنا پارتیا دەمۆکراتا کوردستانێ ژ بۆ پەرچەیێن دن یێن کوردستانێ ژی جھێ ھێڤی و سەرھلدانێ بوو و ژ دایکبوونا پارتی دەستپێکەکە نوو بوو ژ بۆ تێکۆشین و خوە رادەستنەکرن و نەھشتنا بێھێڤیێ. جھێ شانازیە پارتیا دەمۆکراتا کوردستانێ خوە ب تو ئیدەۆلۆژیەکە تەنگ و ھزرییا شۆڤەنی و توندیێ ڤە گرێنەدایە و بویە سێوانەک ژ بۆ وێ یەکێ کو ھەموو پێکھاتێن نەتەوەیی و ئۆلییێن کوردستانێ ل بن دا کۆمببن و ئەڤە ب خوە دەستکەفتەکە بێوێنە و سەردەمیانە بوو ل پێشکەتنا ھزرا سیاسیا ل کوردستانێ دا. پارتی ھەردەم ھلگرێ پەیاما ئاشتیێ بوویە و بەردەوام ژی ئامادە بوویە ژ بۆ بەرەڤانیکرنا کورد و کوردستانێ.
د دەما نھا دە ئارامی و پاراستنا کوردستانێ و بھێزکرنا پێکڤەژیان و ئارامی و برایەتی و تەبایییا د ناڤبەرا ھەموو پێکھات و ئالیێن سیاسیان و بھێزکرنا دام و دەزگەھێن ھەرێما کوردستانێ ئەولەویەتا سەرەکیا سیاسەتا پارتییە. ھەروه‌ها پارتی تەکەز ل وێ یەکێ دکە کو دۆزا رەوایا گەلێ کوردستانێ پێویستە ل رێیا ئاشتی و ھەڤدوو تێگھیشتنێ و داوی ب زمانێ ئینکار و خوەسەپاندنێ بێ چارەسەر کرن. د دەربارێ رەوشا ئراقێ ژی مخابن ئەو سەدەمێن کو بوونە ھۆکارێن سەرھلدانا تەرۆر و نه‌ئارامیێ ژی مانە. ھەر ل ڤی واری دە ئەز باوەرم ھلبژارتنێن پاشەرۆژێ یێن ئیراقێ دکارێ ببە دەرگەھەکە باش ژ بۆ نووبوونا پرۆسەیا سیاسی و چەسپاندنا ئیرادەیا وەلاتیان ژ بۆ گووھەرتن و گه‌هشتنا ب ئارامیێ.
ل ڤێ سالڤەگەرا پیرۆز دا پێویستە ھەموو پارتی ل ئاستا مەزناھیا دیرۆکێ و قوربانیدانا پارتیێن خوە بن و تو دەمەکێ ئەوە ژ بیرا وان نەچێ کو پارتی(پدک) پارتیەکە خوەدیێ دۆزەکێیە و خوەدیێ رێبازا بارزانییە و ب ناڤێ رزگاری و خزمەتا کوردستانێ ھاتیە دامەزراندن. پێویستە ژ بەرێ بھێزتر رووبروویێ گەفان ببە و دەرفەتان ژی ژ بۆ بھێزتربوونا کوردستانێ بکاربینن و ئەرکێ خوەیا ژ بۆ پێشخستنا ئاڤادانی و پێکڤەژیان و تەبایییا کوردستانێ، ب باشترین ئاوایی ئەنجام بدن.
