گۆتارا نێچيرڤان بارزانى سه‌رۆكێ هه‌رێما کوردستانێ ل رۆژنامه‌يا تايمز يا بريتانى به‌لاڤبوویه
خۆڤه‌كێشانا ب له‌ز يا رۆژئاڤاى ژ ئه‌فغانستانێ، بابه‌تێ دەستوەردانا ليبرالى ئينايه به‌ر به‌حس. ئه‌ڤ دانوستاندنه گه‌له‌ك جاران وێ راستيێ ل به‌رچاڤ ناگريت كو هه‌مى ده‌ستوه‌ردان د خراب نينن.
ئه‌و گاڤا ل سالا 1991 ژ لايێ بريتانيا، ويلايه‌تێن ئێكگرتى يێن ئه‌مريكا، فره‌نسا و وه‌لاتێن دى ڤه ل كوردستانا ئيراقێ هاتيه هاڤێتن، ب سه‌دان هزار هه‌ڤنيشتيمانيێن من ژ كوشتنێ ژ لايێ سه‌ددام حوسه‌ينى ڤه رزگاركرن.
ئۆپه‌راسيۆنا نه‌وايا ئارام كو هزرا سه‌ره‌كى يا ’جۆن مه‌يجه‌ر’ بوو هه‌روه‌سا ده‌ڤه‌را ئارام كو د دويڤ ئۆپه‌راسيۆنێ دا هات، كوردستان بۆ دەمێ 12 سالان پاراست. وێ بزاڤێ زه‌مينه و سه‌قامگيريه‌كا رێژه‌يى بۆ برێڤه‌چوونا هه‌لبژارتنان، دامه‌زراندنا په‌رله‌مان و سازيێن حكومه‌تێ و هێزه‌كا سه‌ربازيا شه‌رعى كو پێشمه‌رگه‌يه درێژيێ ب ئه‌ركێن خۆ بده‌ت، ره‌خساند. ده‌مێ ئيراق ل سالا 2003 هاتيه ئازادكرن، ب هزاران گوند كو ژ لايێ به‌عسيان ڤه هاتبوونه وێرانكرن، مه ئاڤه‌دانكرن. پاشى مه پيشه‌سازيا په‌ترۆلێ و ئابووريه‌كا بازارێ گه‌شه‌كرى دامه‌زراند.
ب كورتى، ده‌ستوه‌ردانا به‌رى 30 سالان رێك دا مه كو وه‌لاتێ خۆ پێشبێخين.
ئه‌ڤرۆ، خه‌لكێ كوردستانێ و بريتانيا دۆستێن بهێزن و د بياڤێن ئابوورى و دژى تيرۆرێ دا هه‌ڤپشك و هه‌ڤپه‌يمانن. سه‌ره‌دانا من يا ڤێ حه‌فتيێ، بلند نرخاندنا ل وێ هەڤپشکیا كويره كو ب رێكا وه‌به‌رهێنانا بريتانيا ل كوردستانێ، خواندنا كوڕ و كچێن مه ل زانكۆيێن بريتانيا و زێده‌بوونا كوردان ل سەرتاسەری شاهنشينا ئێكگرتى دا ره‌نگڤه‌دده‌ت.
لێ شه‌رێ مه يێ هه‌ڤبه‌ش ل دژى تيرۆرێ ته‌مام نه‌بوويه و مه پێدڤى ب ئاراميا ستراتيژى هه‌يه.
داعش تا نها ل ئيراق، سووريا و جهێن دى مايه. مه ديت چه‌وا تاليبان بۆ ئه‌گه‌رێ هێلانا نه‌يارێن وێ بۆ ئه‌فغانستانێ، داعش ژى يا ب له‌ز نينه و خۆ راده‌ست ناكه‌ت. پێشمه‌رگه د گه‌ل هێزێن ئيراقى و هێزێن رۆژئاڤا د رويبرويبوونا ڤێ گه‌فێ دا د به‌رده‌وامن، ژبەر کو پاشه‌رۆژا مه و ئێمناهيا هه‌ڤپه‌يمانان كو د سالێن بۆرى دا كارێن تيرۆرستى د وه‌لاتێن وان دا رويدابوون، پشتبه‌ستنێ ل سه‌ر ڤێ چه‌ندێ دكه‌ت.
كوردستان د هێلا سينگى يا پێكدادانێ د ناڤبه‌را ئازادى و خوه‌سه‌پاندنێ، هیڤی و تاريێ دا يه. گرۆپێن راديكال و تيرۆرستى، گه‌فێ ل مه و شێوازێ ژيانا مه دكه‌ن. زێدەباری وێ چه‌ندێ، ئه‌م دێ وه‌ك ده‌ڤه‌ره‌كا ئارام و لاندكا ئێكدو قه‌بويلكرنێ مينين. مه مێهڤانداريا نزيكى مليۆن په‌نابه‌رێن سوورى و ئاواره‌يێن ئيراقى كريه كو خۆ ژ ده‌ستێن داعش رزگاركرينه، ئه‌گه‌ر مه ده‌رگه‌هێن خۆ ڤه‌نه‌كربان، ئه‌و كه‌سێن هه‌نێ يان دا هێنه كۆشتن يان دا كۆچبه‌رى ئه‌ورۆپا بن.
ئه‌م پێشوازيێ ل هه‌موو بيروباوه‌ران دكه‌ين و وان دحه‌وينين: كريستيان، ئێزدى، موسلمان و هه‌موو ئاینزانێن دی.
گه‌نگه‌شه‌كرنا ئه‌وا ل ئه‌فغانستانێ رويداى، دێ ل پاشه‌رۆژێ گه‌رمتر بيت، لێ ده‌ستتێوه‌ردان د كوردستانێ دا ژ بۆ شاهنشينا ئێكگرتى و مرۆڤايه‌تيێ سه‌ركه‌فتن بوو. راسته كو دڤێت سه‌ربۆر ژ شاشيێن لايه‌نه‌كێ بهێنه وه‌رگرتن، لێ يا گرنگه ژى سه‌ركه‌فتنا لايه‌نه‌كێ دى ب گرنگ و شكۆدار بهێته ديتن.
