كۆمپانیا نه‌ته‌وه‌ى یا غازا ئیرانێ راگه‌هاند، وه‌زاره‌تا كاره‌با ئیراقێ ب كۆژمێ پێنج ملیار دۆلاران قه‌ردارا وێ كۆمپانیێ یه، ژ به‌ر ڤێ یه‌كێ ژى هنارتنا غازێ كێمكرییه.
كۆمپانیا نه‌ته‌وه‌ى یا غازێ یا ئیرانى د راگه‌هاندنه‌كێ دا ئاشكرا كر، سێ ملیار دۆلارێن فرۆتنا غازێ بۆ وه‌زاره‌تا كاره‌با ئیراقێ د به‌نكا ناڤه‌ندى یا وى وه‌لاتى دا هاتینه بلۆككرن و نه‌شێن ب ده‌ستڤه‌بینن.
ئاماژه ب وێ یه‌كێ ژى كر، زێده‌ترى دو ملیار دۆلارێن دى یێن وان ل نك وه‌زاره‌تا كاره‌با ئیراقێ نه و چه‌ندین جاران ئه‌و ئاگه‌هدار كرینه، لێ وه‌زاره‌تێ چ گرنگى ب ئاگه‌هدارییا وان نه‌دایه، د هه‌مان ده‌م دا پێدڤى یه ئیراق ئێك ملیار دۆلاران سزایێ گیرۆكرنا وان قه‌ران ژى بده‌ت.
پێشتر ئه‌حمه‌د مووسا، په‌یڤدارێ وه‌زاره‌تا كاره‌با ئیراقێ راگه‌هاندبوو، ژ ئه‌گه‌رێ پێنه‌دانا قه‌رێن به‌رێ یێن كرینا غازێ، ئیرانێ قه‌بارێ هنارتنا غازێ بۆ ئیراقێ ژ پێنج ملیار مه‌ترێن سێجا بۆ سێ ملیار مه‌ترێن سێجا كێمكرییه، ئه‌ڤێ یه‌كێ ژى كارتێكرن ل سه‌ر كێمبوونا پێدانا كاره‌بێ ل به‌غدا و ده‌ڤه‌را فۆراتا ناڤه‌راست هه‌یه.
