ئاژنسا خانی: ھەژار مەعرۆف
ل رۆژا ئه‌ینى یا بورى ل هه‌ولێرا پایته‌خت فه‌ستیڤالا نایكو یا نیڤده‌وله‌تى یا وه‌رزشى ب پشكداریا هژماره‌كا زورا یاریزانێن ده‌رڤه و نافخۆ هاته‌كرن.
د ڤێ فه‌ستیڤالێ دا سێ كارتێن پرۆ IFBB PRO هاتنه به‌خشین و ئێك ژ وان بۆ كورێ باژێرێ دهۆكێ (ئازاد شنگالى) بۆ، كو شیا لسه‌ر ئاستێ خوه ببیته خودانێ رێزا ئێكێ .
لدور ڤێ قاره‌مانیێ چه‌ندین ره‌خنه و گله‌یى ژلایێ پشكداران ڤه هاتنه كرن تایبه‌ت لسه‌ر ئاستێ دادڤانیا قاره‌مانیێ
ئێك ژ یاریزانێن پشكدار ب ناڤێ (جوتیار احمد)، وه‌سا دبینیت زولم لێ هاتیه كرن گوت: ئه‌ڤ قاره‌مانیه فلمه‌كێ دروستكرى بوو ژلایێ رێكخه‌رێن قاره‌مانیێ ڤه و وانا دڤیا كه‌سه‌كى بكه‌نه قاره‌مان كو ب چ شێوا یێ ژ هه‌ژى نه‌بوو ببیته قاره‌مان و ئه‌و كه‌سێ ئه‌ڤ یاریزانه كریه قاره‌مان ژ جه و پوستێ خوه دترسیت له‌ورا ژى ئه‌ڤ زولمه لمن و گه‌له‌ك یاریزانێن دى هاته‌كرن ، له‌ورا ژى ژبه‌ر ڤێ چه‌ندا لگه‌ل من هاتیه‌كرن هه‌تا هه‌تا پشكدارى ڤێ قاره‌مانیێ نابم چنكو چ دادوه‌رى تێدا نه‌بوو .
ژلایه‌كێ دیڤه قاره‌مانێ جیهانى (ئه‌حمه‌د فه‌وزى) كو ل قاره‌مانیێ یێ به‌رهه‌ڤ بوو گوت : ژلایێ رێكخستنێ ڤه قاره‌مانى ژ سالێن بورى باشتر بوو لێ ژلایێ دادوه‌ران ڤه هه‌ر گه‌له‌ك خه‌له‌تى هه‌بوون و بشێوه‌كێ ئاشكرا زولم ل گه‌له‌ك یاریزانان هاته‌كرن و ئه‌گه‌ر بڤى شێوه‌ى بیت بو سالێن بهێت ناهێلم یاریزانێن من پشكدار ببن و پشتىڤانیا كه‌سێ ژى ناكه‌م پشكدارى ڤێ قاره‌مانیێ بن چنكو مه هزركر ئه‌م دێ پشكدارى ڤێ قاره‌مانیێ بین ل وه‌لاتێ خوه هه‌ر چنه‌بیت مافێ مه بهێته‌دان لێ ب مخابنى ڤه مافێ یاریزانێن مه هاته‌خارن و یاریزانێن بوینه قاره‌مان راسته هه‌ر كورێ باژێرێ مه بوو لێ نه‌یێ ژ هه‌ژى بوو ببیته قاره‌مان .
ژلایه‌كێ دیڤه قاره‌مانێ ئیرانى (مه‌هدى موسته‌فا) گوت: لده‌ستپێكێ ئاستێ دادڤانیێ یێ باش بوو لێ د قۆناغا دووماهیێ دا دادڤان هاته گهورین و زولم لمن هاته‌كرن و من لگه‌ل دادڤانان ئاخفت وان بومن دیاركر كو ئه‌نجامێ دایه من لێ رێكخه‌ر و به‌رپرسێن ڤێ قاره‌مانیێ ده‌ستكارى د به‌رژه‌وه‌ندیا خودا ئه‌نجامان دا كر.
زێده‌تر ناڤبرى گوت: زولمه‌كا مه‌زن لمن هاته‌كرن و لپێش چاڤێن هه‌میان سه‌رێ من هاته برین و ئێدى پشكدارى ڤێ قاره‌مانیێ نابم چنكو پشت راستم سالێن بهێت ژى دێ هه‌مان زولم ل یاریزانا هێـته‌كرن و پێدڤیه ئاستێ دادڤانیێ بهێته باشتر لێكرن چنكو دێ ڤیدیو و وێنه هینه به‌لاڤكرن و خه‌لك دێ ڤێ زولمێ بینیت.
ئێك ژ قاره‌مانێن جیهانى ب ناڤێ (مه‌هدى حه‌یده‌رى) كو وه‌ك ته‌ماشه‌ڤان لڤێ قاره‌مانیێ یێ به‌رهه‌ڤ بوو و خودان چه‌ندین ناسناڤێن جیهانى و ئاسیایه گوت : ئاستێ دادوه‌ریێ جهێ گومانێ بوو تایبه‌ت د قوناغا دووماهیێ دا و ب تایبه‌ت د هاته‌دیتن كو رێكخه‌ر و به‌رپرسێن ڤێ قاره‌مانیێ ده‌ستكارى د ئه‌نجامان دا كر و ئه‌و یاریزانه هه‌لبژارتن یێ نێزیكى وان و ئه‌ز باوه‌رم ئێدێ یاریزانێن ئیرانى ب هیچ شێوه‌كێ پشكدارى ڤێ قاره‌مانیێ نابن.
ژلایێ خوڤه قاره‌مانێ ڤێ قاره‌مانیێ و خودانێ كارتا پرۆ (ئازاد شنگالى) گوت: ئاستێ قاره‌مانیێ گه‌له‌كێ باشبوو ژلایێ رێكخست و دادوه‌ریێ ڤه و ل هه‌مى جهان وه‌سایه كه‌سێ نه‌بیته یه‌كه‌م دێ ره‌خنا گریت و به‌روڤاژى هه‌مى تشته‌ك ب باشى برێڤه‌چوو و ئه‌نجامێ من بده‌ستخوڤه‌ئیناى به‌رهه‌مێ ماندیبوونا من بوو سوپاس بو خودێ من نه‌هێلا ئه‌ڤ ده‌ستكه‌فته ژ وه‌لاتێ مه بده‌ركه‌ڤیت .
لدووماهیێ ئێك ژ رێكخه‌رێن ڤێ قاره‌مانیێ (بهنام سه‌میمى) گوت: ئه‌م گه‌له‌ك ژ ئاست و رێكخستنا ڤێ قاره‌مانیێ د رازى بووین و مه زولم ل چ یاریزانا نه‌كریه و ئه‌و یاریزانین ژ هه‌ژى بوینه قاره‌مان.
