24% زیانێن ئابووری یێن کارەساتێن سرووشتی زێدەبووینە

کۆمپانیا “سویسری” یا تایبەت ب دابینکرنا بیمەى راگەهاند، د سەرژمێرەکا دەسپێکیدا زیانێن ئابووری یێن کارەساتێن سرووشتی د سالا 2021دا، نێزیکی 250 ملیار دۆلارانە.
گۆرەی زانیاریێن”فرانس24″، زیانێن ئابووری یێن کارەساتێن سرووشتی هه‌مبه‌ر سالا بووری 24% زێدەبووینە.
د ئەڤ سالەدا بۆ کۆمپانیێن بیمەی بابەلیسکا ئایدا گرانترین کارەساتا سرووشتی بوو، کو بۆ ئەگەرێ دروستبوونا لەهیان ل نیۆیۆرک و زیانێن وێ یێن ئابووری د ناڤبەرا 30 ملیار بۆ 32 ملیار دۆلاران بوون، پاش بابەلیسکا زڤستانێ یا بناڤێ ئوری ل ئەمریکا دەستپێکر، کو پێلێن وێ یێن سەرمایێ گەهشتنە تکساس و زیان گەهاندنە تۆڕێن کارەبێ، و زیانێن کومپانیێن بیمە ب 15 ملیار دۆلاران هاتنە خەملاندن.
ئەورۆپا و ئەلمانیا و بەلجیکا و وڵاتێن جیران د مەها تەموزێ دا ب بهایێ 40 ملیار دۆلاران زیانێن ئابووری ژ ئەگەرێ لەهیان هەبوون.
جوودا ژ کارەساتێن سرووشتی، زیانێن ئابووری د کارەسات و روودانێن مرۆڤیدا 9 ملیار دۆلار بوون.