مەرەما بجهئینانا پرۆژەیێ دروستکرنا مۆزەخانەکا مۆدێرن و نیشتیمانی ل کەلا نزارکێ یا تایبەت بیت ب ئەنفال و جینۆسایدێن دژی گەلێ کوردستانێ هاتینە ئەنجامدان ، سەرۆکێ زانکۆیا دهۆك د. داوود سلێمان ئەترووشی کۆمبوونەك دگەل لایەن و مامۆستا و کەسایەتیێن بسپۆر و پەیوەندیدار ب ئەنفال و جینۆسایدا ڤە ئەنجامدا.
د ڤێ کۆمبوونێدا و ب بەرهەڤبوونا فەهیم عەبدوللا حەمۆ سەرۆکێ جڤاتا پارێزگەها دهۆکێ و هژمارەك ژ رێڤەبەرێن حکمی و رێکخراو و کەسایەتیێن بسپۆر و پەیوەندیدار ب بابەتێ جینۆسایدێڤە، دانوستاندنێن هویر و زانستی لدۆر ناڤ و ناڤەرۆك و پێکهاتە و گرنگیا ڤی پرۆژەی ئەنجامدان.
ل دەستپێکێ سەرۆکێ زانکۆیا دهۆك گۆت: زانکۆیا مه گرنگیەکا مەزن ب ڤی پرۆژەی ددەت و ئەم دێ هەمی بزاڤا کەین کو زانکۆیا دهۆك ببیتە چەترەك بۆ دروستکرنا هەماهەنگیێ د ناڤبەرا لایەنێن پشکدار دا ب ئارمانجا بجهئینانا ڤی پرۆژەی.
د. داوود ئەترووشی هەروەسا دیارکر: بەری نوکە پرۆژەیەکێ ب ڤی رەنگی هەبوویە و کار تێدا هاتییه‌کرن، ژبەر کاودانێن ئێمناهی و ئابووری و شەرێ دژی داعش، ئەڤ پرۆژە هاتە راوەستاندن، لێ وەکو زانکۆیا دهۆک ژبەر گرنگیا ڤی پرۆژەی بۆ هەرێما کوردستانێ ب گشتی و پارێزگەها دهۆکێ ب تایبەتی، مە دڤێت ڤی پرۆژەی ب شێوەیەکێ پتر رێکخستی و پلان بۆ دانای دەستپێبکەینە ڤە.
د. سالم جاسم سەرۆکێ سەنتەرێ ڤەکۆلینێن جینۆسایدێ ل زانکۆیا دهۆك باس ل گرنگی و کاریگەری و ناڤەرۆک و ئارمانجێن پرۆژەی کر و ئاماژە دا گرنگیا کەلا نزارکێ و گۆت: جینۆساید د سێ قۆناغا را دەربازدبیت، پلانا بکەرێن جینۆسایدێ، کۆمکرنا قوربانیا و پاشی ژناڤبرنا وان، پێنگاڤا دووێ یا جینۆسایدا دژی خەلکێ دەڤەرا بادینان ل کەلا نزارکێ بوویە، پاشی ناڤبری باس ل بزاڤێن بەری نوکە یێن زانکۆیا دهۆک کر بۆ بجهئینانا ڤی پرۆژەی.
سەرۆکێ جڤاتا پارێزگەها دهۆك فەهیم عەبدوللا ژ لایێ خۆ ڤە باس ل وێ یەکێ کر کو ئەڤە چەندین سالە دانوستاندن لدۆر ڤی پرۆژەی دهێنەکرن، لێ وەکو پێدڤی کار لدۆر جینۆسایدێ نەهاتیە ئەنجامدان و گۆت: خەلکەکێ گەلەک ب رژدی و جوانی لدۆر جینۆسایدێن دژی مللەتێن وان هاتینەکرن کارکریە کو ئەڤ دیرۆکە د سەرێ رڤشتێ نوی ژی دا ساخ هێلایە، چونکو ئەگەر وەکو پێدڤی کار نەهێتەکرن، دێ ڤەقەتیان دناڤبەرا رڤشتا دا دروستبیت و د ئەنجامدا دێ ژ دیرۆکا خۆ ڤەقەتیێن، ئەڤە ژی مەترسیەکا مەزنە. جهێ خۆشحالیێ یە کو ل ڤان سالێن دویماهیێ رژدیێ د ڤی بواریدا دبینم، ب تایبەت ژ لایێ سەنتەرێ ڤەکۆلینێن جینۆسایدێ ل زانکۆیا دهۆك.
