وه‌زاره‌تا په‌روه‌ردێ و په‌یمانگه‌ها گۆته‌ یا ئه‌لمانى هه‌ڤبه‌سته‌ك ئیمزاكر

وه‌زاره‌تا په‌روه‌ردێ یا حكومه‌تا هه‌رێما كوردستانێ هه‌ڤبه‌سته‌كا لێك تێگه‌هشتنا هه‌ڤپشك دبوارێن په‌روه‌رده‌ و فێركرنێ دا دگه‌ل په‌یمانگه‌ها گۆته‌ یا ئه‌لمانى ئیمزاكر.

وه‌زاره‌تا په‌روه‌ردێ دراگه‌هاندنه‌كێ دا دیاركر، وه‌زیرێ په‌روه‌ردێ ئالان حه‌مه‌ سه‌عید سالح ب هه‌ڤالینییا رێڤه‌به‌رێ گشتى یێ دیوان و رێڤه‌به‌رێ گشتى یێ ئاماده‌یى و پیشه‌یى ل وه‌زاره‌تێ، پێشوازى ل كونسۆلێ گشتى یێ ئه‌لمانیا كلیمێنتس زمنتر و رێڤه‌به‌رێ په‌یمانگه‌ها گۆته‌ ئه‌نه‌یس بیۆلیك و شانده‌كێ هه‌رێما كوردستانێ كر.

و زێده‌تر دیاركر، دگه‌ل شاندێ ئه‌لمانیا دووپاتى ل بهێزكرنا په‌یوه‌ندییێن هه‌ردوو لایان ب تایبه‌ت دبوارێن گه‌شه‌پێدانا په‌روه‌رده‌ و فێركرن و پێشڤه‌برنا قوتابخانه‌یێن ئه‌لمانى ل هه‌رێما كوردستانێ هاته‌ كرن، و ئه‌وژى ئاشكراكر كو هه‌ڤبه‌سته‌كا لێك تێگه‌هشتنێ دگه‌ل په‌یمانگه‌ها گۆته‌ بۆ ماوه‌یێ چوار سالان هاته‌ ئیمزاكرن.