د سالێن بووری دا دیاردا کێشانا جگاران و نەرگیلێ ل نک ژنان پەیدابوویە، خودانێ کافیەکێ ژی دبێژیت: بەراورد ل گەل سالا پار دوجارکی رێژا وان ژنان زێدەبوویە یێن جگاران و نەرگیلێ دکێشن.
کچەک کو ئەڤە بۆ دەمێ دو سالانە جگاران و نەرگیلێ دکێشیت گۆت: نھا جھێن تایبەت بۆ کێشانا نەرگیلێ بۆ ژنان ژی ھەنە، مالاتێن وان رێ ب وان دایە دان، ئەو ژی وەکو ھەڤال پێکڤە سەرەدانا وان کافیان دکەن و دەمێ خوە دبوورینن.
شڤان ئەکرەم، خودانێ کافیەکێ یە دیارکر، بەراورد ل گەل سالێن بەرێ رێژا وان کچێن نەرگیلێ و جگاران دکێشن زێدەبوویە، پتریا وان کچان ژی خێزانێن وان پێ ئاگەھدار نینن، گەلەک جاران ئاریشە ژ بەرڤێ چەندێ بۆ وان کچان پەیدابووینە، ھەروەسان ل نک ھندەک کچان ژی بوویە چاڤلێکرن یان مەتحەک.
نۆشدار فەلاح حەسەن، دیارکر، جگارەکێشانێ ب گشتی کراتێکرنەکا خراب ل سەر ساخلەمیا مرۆڤی ھەیە، کو دبیتە ئەگەرێ گەلەک نەخۆشیان و گەلەک جورێن پەنجەشێرێ، کێشانا جگاران و نەرگیلێ ل نک ژنان دێ بیتە ئەگەر ھورمۆنێ ستروجین ل نک وان کێم بیت و ھورمۆنا تستستیرون زێدەبیت، ئەڤ چەندە ژی دێ بیتە ئەگەر مەھیکا وان تێک بچیت، ھەروەسان دوگیانی ل نک وان دێ ب زەحمەت بیت یان ئەگەر ب دوگیان ژی کەفتن گەلەک زەرەر و زیان دگەھنە زارۆکی، گەلەک زارۆک د زکێ دەیکێ دا دمرن گەلەک بەری دەمێ خو ژ دایک دبن و کێشا وان یا کێمە، گەلەک ژ وان زارۆکان ژی تووشی نەخۆشیێن زکماکی دبن.
خانی نیوز، مەنیجا ئەیوب
