وه‌زیرێ په‌روه‌ردێ: په‌روه‌ردا ئیسلامى نه‌هاتییه‌ لادان و ناهێته‌ لادان ژى

ئالان حه‌مه‌سه‌عید وه‌زیرێ په‌روه‌ردێ یێ حكومه‌تا هه‌رێما كوردستانێ د كونگره‌كێ رۆژنامه‌ڤانى دا راگه‌هاند: ئه‌ڤرۆ چه‌ند ماموستایێن ئایینى ژ ئێكه‌تییا زانایان و جڤاتا بجهئینانێ داخواز كربوون و پروگرامێ نوو یێ په‌روه‌ردا ئیسلامى بۆ وان بهێته‌ شرۆڤه‌كرن‌، دا كو ببینن پرۆگرامێ وان چ جۆره‌ پرۆگرامه‌كه‌، گوت ژى ب مخابنى ڤه‌ ل ده‌مێ بورى ئه‌و كه‌سێن نه‌شییاین شه‌رێ گه‌نده‌لیێ دگه‌ل وان بكه‌ن رابووینه‌ ب به‌لاڤ كرنا بابه‌ته‌كێ وه‌سا كو بۆ خه‌لكێ یا گرنگ بیت.

 دووپات كر ژی: ئه‌و چ بریاران ب ئیمزایا وى ده‌رباره‌یى گوهۆرینا په‌روه‌ردا ئیسلامى نابینن، هه‌ر كه‌سه‌كێ دیت ژى بلا بێمنه‌تى ڤه‌ به‌لاڤ بكه‌ت، ‌په‌روه‌دا ئیسلامى نه‌ هاتیه‌ لادان و نا لاده‌ین ژى.

ئاشكرا ژى كر: ژماره‌كا كێم ژ ماموستایێن ئایینى كو پێشنڤێژییێ بۆ موسلمانا دكه‌ن تووشی ڤێ شاشیێ بووینه‌ و گوتینه‌ په‌روه‌ردا ئیسلامى هاتییه‌ گوهۆرین و گوتییه‌ وه‌زیرێ په‌روه‌ردێ بریار دایه‌ كو نابیت بێژن” قورئانا پیرۆز به‌لكو ب تنێ دێ بێژن قورئان، و نابیت بێژن پێغه‌مبه‌ر(س.خ) به‌لكو بێژن محه‌مه‌د ب تنێ” ئه‌ڤێ چه‌ندێ چ بنه‌مایه‌ك نینه‌.

ئالان حه‌مه‌سه‌عید دیار ژى كر، وان باوه‌ری ب پێكڤه‌ ژیانا ئایینی هه‌یه‌ و بۆ هه‌ر ئایینه‌كى پرۆ‌گرامێ په‌روه‌ردا وان دانایه‌ و بۆ زارویێن موسلمانان ژى ب ئه‌ركێ خوه‌ دزانن په‌روه‌ردا ئیسلامى بۆ بهێته‌ دانان، چ كه‌سه‌كێ دناڤ حزبێن سیاسى دا ب نوونه‌رێ ئاینیێ ئیسلامێ نادانن، داخواز دكه‌ت داخوازكارێ گشتى بهێته‌ سه‌ر هێلێ.