ئهڤرۆ 19ى تهموزا 2022ێ سهرۆكێ ههرێما كوردستانێ نێچیرڤان بارزانى پێشوازى ل بالیۆزێ فرهنسا ل عیراقێ ئێریك شۆڤالییێ كر.
دكۆمبوونهكێ دا كو كۆنسۆلێ گشتى یێ فرهنسا ل ههولێرێ ئولیڤییێ دیكۆتینى ژى تێدا یێ پشكداربوو، دووماهى پێشهاتێن رهوشا سیاسى و ئێمناهى یا عیراقێ و بزاڤێن ههلبژارتنا سهرۆككومار و پێكئینانا حكومهتا نوو یا عیراقێ و پهیوهندییێن ههولێر و بهغدا و رووبرووبوونا مهترسییێن داعشێ ب تایبهت ل دهڤهرێن مادێ 140 و پێشهاتێن دهڤهرا شنگالێ و رهوشا ههرێما كوردستانێ و ههلبژارتنێن بهێن یێن پهرلهمانێ كوردستانێ هاتنه گوتوبێژكرن.
بالیۆزێ فرهنسا دووپاتى ل گرنگیدانا وهلاتێ خوه بۆ پێشڤهبرنا پهیوهندییێن دگهل عیراق و ههرێما كوردستانێ و ئارامى و سهقامگێرییا عیراقێ بۆ پاراستنا سهقامگێرییا دهڤهرێ كر.
ژلایێ خۆڤه سهرۆك نێچیرڤان بارزانى دووپاتكر، چارهسهركرنا كێشهیێن ههولێر و بهغدا كلیلا ئارامى و سهقامگێرییا عیراقێ یه، و ههبوونا میكانیزمهكێ بۆ دانوستاندن و چارهسهركرنا كێشهیێن ههلاویستى ب پێدڤى هژمارت.
ههردوو لایان دووپاتى ل پێدڤى و گرنگییا بهردهوامبوونا هاریكارى و ههماههنگییا دناڤبهرا پێشمهرگه و لهشكهرێ عیراقێ دا ب پشتهڤانییا هێزێن ههڤپهیمانان بۆ رووبرووبوونا گهف و مهترسییێن داعشێ ب تایبهتى ل دهڤهرێن مادێ 140 یێ دهستوورى كر.
