جڤاتا بلند یا دادوه‌ری: سكالا ل دژی مالكی ل سه‌ر تۆمارا ده‌نگی ژ لایێ دادگه‌هێ ڤه‌ هاته‌ وه‌رگرتن

جڤاتا بلند یا دادوه‌رییا عیراقێ د راگه‌هاندنه‌كێ دا ئاشكرا كر، دێ سكالایه‌كێ ل دژى نورى مالكى ده‌رباره‌یی تۆ‌مارێن وى یێن ده‌نگى تۆمار كه‌ن و ڤه‌كۆلینێ ده‌ستپێكریه‌.

د راگه‌هاندنه‌كا جڤاتا بلندا دادوه‌رى ل عیراقێ دا هاتییه‌:  سكالا ل دژى نورى مالكى گه‌هشتییه‌ دادگه‌ها ڤه‌كۆلینا كه‌رخ ل به‌غدا و هاتییه‌ راده‌ستكرن بۆ داخوازكه‌رێ گشتى و ل دووڤ رێكێن قانوونی ڤه‌كۆلینان ده‌سپێكرییه‌، ل دووڤ ده‌قێ سكالایێ مالكى یێ تۆمه‌تباره‌ ب هنده‌ك تۆمارێن ده‌نگى كو دبنه‌ ئه‌گه‌رێ سه‌رهلدانا شه‌رێن ناڤخۆیی و سفكاتى كرنه‌ ب سه‌ركردێن عیراقێ.

د چه‌ند رۆژێن بورى دا هنده‌ك تۆمارێن ده‌نگى یێن نورى مالكى سه‌رۆكێ حزبا ده‌عوا ئیسلامى به‌لاڤببوون، ل دووڤ وان تۆماران مالكى هێرش كرییه‌ سه‌ر سه‌ركردێن سیاسی ب تایبه‌تى موقته‌دا سه‌دری، رێبه‌رێ ره‌وتا سه‌در.

هه‌ڤده‌م موقته‌دا سه‌در، رێبه‌رێ ره‌وتێ سه‌در داخواز ژ مالكى كر ده‌ست ژ كارێ سیاسه‌تێ به‌رده‌ت و داخوازا لێبورینێ بكه‌ت.

به‌رى چه‌ند ده‌مژمێران تۆمارا پێنجێ یا ده‌نگێ مالكى به‌لاڤبوویه‌ و تێدا دبێژیت په‌یوه‌ندییا وى ل گه‌ل قه‌یس خه‌زعه‌لى ئه‌میندارێ گشتی یێ عه‌سائیبى ئه‌هلێ حه‌ق و ئه‌بو ئالا وه‌لائی، ئه‌میندارێ گشتی یێ كه‌تائیب سه‌یدولشوهه‌دا یا باشه‌.

ل دووڤ تۆمارێن ده‌نگی” مالكى ئاماژه‌ ب هندێ كرییه‌ ئه‌و هه‌موو راسته‌وخۆ سه‌ر ب ئیرانێ ڤه‌نه‌ و به‌در و فه‌تح دبێ كارن و گوهـ ناده‌نه‌ ره‌وشێ و د ناڤ باخچێن خوه‌ دانه‌.