شانه‌یا ئێمناهییا عیراقێ راگه‌هاندنه‌ك ل دۆر تۆپ بارانكرنا په‌ره‌خێ به‌لاڤكر

شانه‌یا راگه‌هاندنا ئێمناهییا عیراقێ راگه‌هاندنه‌ك ل دۆر شه‌هیدبوونا ژماره‌كا وه‌لاتییان و برینداربوونا پتر ژ 20 كه‌سێن دى ل زاخۆ ژ ئه‌گه‌رێ تۆپ بارانێن توركیا به‌لاڤكر.

دراگه‌هاندنێ دا هاتییه‌، ئه‌ڤرۆ چارشه‌مبى 20 ته‌موزا 2022ێ ل ده‌مژمێر ئێك و 50 خۆله‌ك یێ نیڤرۆ، ده‌ڤه‌را گه‌شتییارى یا گوندێ په‌ره‌خێ یێ سه‌ر ب ناحییا ده‌ركارێ یا سه‌ر ب قه‌زا زاخۆ یا پارێزگه‌ها دهۆكێ ڤه‌، تووشى تۆپ بارانه‌كا توند بوو و دئه‌نجامدا هه‌شت وه‌لاتى شه‌هیدبوون و 23 یێن دى برینداربوون و هه‌موو ژى گه‌شتییاربوون.

هه‌روه‌سا دراگه‌هاندنێ دا هاتییه‌، فه‌رمانده‌یێ گشتى یێ هێزێن چه‌كدارێن عیراقێ مسته‌فا كازمى فه‌رماندایه‌ هه‌ر زوو ڤه‌كۆلین ل دۆر ڤێ روودانێ بهێته‌كرن، و شانده‌ك كو ژ وه‌زیرێ ده‌رڤه‌، جێگرێ فه‌رماندێ ئوپه‌راسیۆنێن هه‌ڤپشك، سكرتێرێ فه‌رماندێ هێزێن چه‌كدار و فه‌رماندێ هێزێن زێره‌ڤانێن سنوورى پێكهاتییه‌، هنارته‌ جهێ روودانێ داكو ڤه‌كۆلینێ بكه‌ن و چاڤدێرییا برینداران بكه‌ن.