هه‌ردو فراکسیۆنێن پارتی و ئێكه‌تییێ ده‌ربارەیی تراشینا سمبێلێن پێشمەرگەكێ کاکەیی راگه‌هاندنه‌ك به‌لاڤكر

هه‌ر ئێك ژ فراكسۆنێن پارتی دیموكراتی كوردستان و ئێكه‌تییا نشتیمانییا كوردستانێ، ده‌رباره‌یى وێ بێ رێزییا ب پێشمه‌رگه‌كێ كاكه‌یى هاتییه‌ كرن ژ لایێ گرۆپه‌كێ حه‌شدا شه‌عبى ڤه‌ كو پرچ و سمبێلێن وى تراشینه‌، په‌یامه‌كا هه‌ڤپشك به‌لاڤكر و ب تۆندى ئیدانه‌كر و داخواز كر ئه‌ڤ كاره‌ بێ سزا ده‌رباز نه‌بیت.

د په‌یامه‌كا هه‌ڤپشك دا، ئه‌ڤرۆ 24 ته‌موزا 2022 ێ، فراكسیۆنا پارتی دیموكراتی كوردستان و ئێكه‌تییا نشتیمانییا كوردستانێ ل په‌رله‌مانێ عیراقێ كارێ وێ گرۆپا حه‌شدا شه‌عبى ب ( بێ رێزییه‌كا ب مه‌ره‌م) ل دژى پیرۆزی یێن كاكه‌ییان ب ناڤكر و دبێژن، ئه‌ڤ كاره‌ پێشیلكارییه‌كا ئاشكرایه‌ بۆ ئازادى و مافێن مرۆڤى و ل دژى پێكڤه‌ ژیانێ یه‌.

هه‌ردو فراكسۆنێن پارتى و ئێكه‌تى ل په‌رله‌مانێ عیراقێ داخواز كر ئه‌و كارێ گرووپا حه‌شدا شه‌عبى كرى بێ سزا ده‌رباز نه‌بیت و داخواز ژ هێزێن ئێمناهیێ كرن ب زووترین ده‌م ڤه‌كۆلینێ لدۆر ڤى بابه‌تى بكه‌ن و یێن ئه‌ڤ كاره‌ كرى ب تۆندى بهێنه‌ سزادان، د ده‌مه‌كى دا ئه‌و پێشمه‌رگێ بێ رێزى لێ هاتییه‌ كرن د شه‌رێ دژى داعشێ دا ل كه‌ركوكێ رۆله‌كێ به‌رچاڤ هه‌بوو.

‌