سه‌رۆكێ حكومه‌تا هه‌رێما كوردستانێ مه‌سرور بارزانى ل سه‌ر ئه‌كاونتێ خوه یێ فه‌یسبۆكى راگه‌هاند، ئه‌ڤرۆ ئه‌وى سه‌رپه‌رشتییا كۆمبوونا جڤاتا وه‌زیران كر و دووماهى گهورین و پێشهاتێن ره‌وشا سیاسى یا عیراقێ گوتوبێژكرن، و دكۆمبوونێ دا ئاماژه ب هندێ هاته دان كو هه‌رێما كوردستانێ دگه‌ل چاره‌سه‌ركرنا كێشه‌یێن عیراقێ ب رێكا دانوستاندنێن ئاشتیانه و ل سه‌ر بنه‌مایێ ده‌ستووری یه، ب جووره‌كى كو رێز ل سیسته‌مێ دیموكراسى و ده‌نگێ وه‌لاتییان بهێته‌گرتن و ئارامى و سه‌قامگێرییا عیراقێ بهێته پاراستن.
هه‌روه‌سا سه‌رۆكێ حكومه‌تێ ئاشكراكر، دكۆمبوونێ دا دووپاتى ل هه‌لویستێ لایه‌نێن كوردستانێ بۆداكوكیكرنێ ل سه‌ر ماف و شایسته‌یێن ده‌ستوورى یێن خه‌لكێ كوردستانێ و پاراستنا ده‌ستكه‌ڤتێن نیشتیمانى كر، و دووپاتى ل وێ چه‌ندێ ژى هاته كرن، هه‌رێما كوردستانێ وه‌كو هه‌ر جار دێ فاكته‌رێ ئارامى و سه‌قامگێرییا عیراق و ده‌ڤه‌رێ بیت.
زێده‌تر مه‌سرور بارزانى دیاركر، به‌حسا به‌رهه‌ڤییێن هه‌ردوو وه‌زاره‌تێن په‌روه‌رده و خواندنا بلند بۆ وه‌رزێ نوو یێ خواندنێ هاته‌كرن، و جڤاتا وه‌زیران دووپاتى ل گرنگییا په‌روه‌رده و خواندنا بلند د كارنامه‌یا كابینه‌یا نه‌هێ دا كر.
گوت ژى : دكۆمبوونێدا دووپاتى ل گرنگییا دابینكرنا گازا سپى بۆ وه‌لاتییان و هه‌ماهه‌نگییا دگه‌ل حكومه‌تا عیراقێ دڤى بیاڤى دا هاته كرن، و بریار هاته دان، به‌رهه‌ڤییێن پێدڤى بۆ دابه‌شكرنا گازا سپى ب تایبه‌ت ل ده‌ڤه‌رێن سار و چیایى بهێنه‌كرن، و وه‌زیرێ سامانێن سرۆشى ب وه‌كاله‌ت و وه‌زیرێ هه‌رێمێ بۆ كاروبارێن دانوستاندنان دگه‌ل حكومه‌تا عیراقێ هاتنه راسپاردن كو كارێ پێدڤى بۆ هاڤێتنا ئه‌ڤێ پێنگاڤێ بكه‌ن.
