سه‌رۆكایه‌تییا هه‌رێما كوردستانێ : نابیت هه‌رێما كوردستانێ ببیته‌ مه‌یدانا ئێكلاكرنا هه‌ڤركییا لایه‌نێن ناكۆك

سه‌رۆكایه‌تییا هه‌رێما كوردستانێ دراگه‌هاندنه‌كێدا ل دوور هێرشێن ئیرانێ بۆ سه‌ر هه‌رێما كوردستانێ دیاركر، ئه‌و ب توندى ئیدانه‌یا ئه‌ڤان هێرشان دكه‌ن و نابیت هه‌رێما كوردستانێ ببیته‌ مه‌یدانا ئێكلاكرنا هه‌ڤركییێن لایه‌نێن ناكۆك.

سه‌رۆكایه‌تییا هه‌رێما كوردستانێ ئاشكراكر، ئه‌و ئیدانه‌یا بۆمبه‌رانا هێزێن كۆمارا ئیسلامى یا ئیرانێ بۆ چه‌ند ئارمانجان ل هه‌رێما كوردستانێ  دكه‌ن، و دووباره‌بوونا ئه‌ڤان هێرش و بوردۆمانان ب تمامى ره‌ت دكه‌ن.

هه‌روه‌سا سه‌رۆكایه‌تییا هه‌رێما كوردستانێ دیاركر، هه‌لویستێ هه‌رێما كوردستانێ یێ روونه‌، كو رێكێ ناده‌ت چ گه‌فێن ئه‌منى بۆ سه‌ر وه‌لاتێن جیران ل سنۆرێن وێ رووبده‌ن، دهه‌مان ده‌مدا دووپاتییێ ل وێ چه‌ندێ دكه‌ت نابیت هه‌رێما كوردستانێ ببیته‌ مه‌یدانا ئێكلاكرنا هه‌ڤركییێن لایه‌نێن ناكۆك.

و ل دووماهییێ سه‌رۆكایه‌تییا هه‌رێمێ دووپاتكر، چه‌ك و هێز ئاریشه‌یان چاره‌سه‌ر ناكه‌ن، و رێكا ئێكانه‌ بۆ به‌روژه‌وه‌ندییا هه‌موو لایه‌نان بتنێ دانوستاندن و ئاشتی نه‌، و داخوازێ ژ حكومه‌تا عیراقێ دكه‌ن ئه‌ركێ خوه‌ بجهبینیت و ئه‌رد و سه‌روه‌رییا وه‌لاتى بپارێزیت.