د سەرەدانەکێ دا بۆ دەڤەرا ئامێدیێ ئەندازیار کەمال محەمەد وەزیرێ کارەبا حکومەتا ھەرێما کوردستانێ سەرا پرۆژێ ھایدرۆپاوەرێ دێرەلۆکێ دا و ل نێزک ئاگەھداری رەوش و چاوانییا رێڤەچوونا کارێ پرۆژەی بوو.
دکۆنگرھیەکی رۆژنامەڤانی دا وەزێری کارەبێ دیار کر: پرۆژەیێ ھایدرۆپاوەرێ دێرەلۆکێ ئێک ژ پرۆژەیێن ستراتیژی یێن دەڤەرێیە و کوژمێ ١٢٩ ملیۆن دولاران ل سەر قەرێن یابانی بۆ ھاتینە تەرخانکرن و دشیاندایە ٣٧ مێگاواتێن کارەبێ بەرھەم بینت، گۆت ژی: پرۆژە ژلایێ دوو کۆمپانیێن ئیرانی ڤە دھێتە چێکرن و نوکە ٧٥% ژ کارێ وێ ب دوماھی ھاتییە.
ئەندازیار کەمال محەمەد دیار ژی کر، ئەڤە ئێکەم پرۆژەیە ل کوردستانێ و عیراقێ ھاتبیتە چێکرن و بشێت کارەبێ ب ئاڤێ بەرھەمبینت، ھەروەسا دێ ئاریشەیا کێمییا ڤۆلتییا کارەبێ ل دەڤەرێ چارەسەرکەت و دێ کارەبا دھۆکێ ب کارەبا ھەولێرێ ڤە گرێدەت.
دەربارەی ئەو کارەبا ژ وەلاتێ تورکیا ژی ھاتییە کڕین وەزیرێ کارەبا ھەرێمێ دیار کر: گرنگییا وێ ئەوە دێ ب مەزاختنەکا کێمتر ل سەر حکومەتا ھەرێما کوردستانێ راوەستیت، و گۆت: ئەو پارێ ژ وەلاتییان دھێتە وەرگرتن وەک کرێیا کارەبێ دبیتە ٣٤% ژ وی پارەیە یا کو کارەب پێ دھێتە دابینکرن و نێزیکێ ترلیۆنەک و ١٧٢ ملیار دینار قەرن ل سەر وەلاتییان.
دەربارەی نەھێلانا زێدەگاڤییان ژی وەزیرێ کارەبێ گۆت: تا نوکە پتر ژ ٤٢٠ ھزار پیڤەرێن زیرەک ل ھەرێمێ ھاتینە دانان و ھیڤییا مە ئەوە ئەڤ پرۆژەیە ل دووماھییا ئەڤ سالە ب دووماھی بھێت، جەختکر ژی کو ب رێکا ڤی پرۆژەی دێ زیدەگاڤی یێن سێکتەرێ کارەبێ ھێنە راکرن و دێ رێگریێ ژ سۆتنا گھۆرکێن تاخان كه‌ت و بارگرانییا ل سەر وێستگەھا ژی دێ کێم کەت.
وەزیرێ کارەبێ راگەھاندی ژی د پلاندایە ل گەل باشبوونا شییانێن دارایی، دێ سکرەکێ دی ل ڤێ دەڤەرێ ھێتە چێکرن کو دێ شیانا بەرھەم ئینانا ٢٦١ ھەبیت.
ھەژی گۆتنێ یە ل دووڤ وی دەمێ بۆ پرۆژێ ھایدرۆپاوەرێ دێرەلۆکێ ھاتییە تەرخانکرن دڤێت ل ھەیڤا ١٢ یا ئەڤ سالە ب دووماھیک بھێت.
خانی نیوز، مەحمود نھێلی
