ئەڤرۆ ئێکەتییا زانایێن ئاینێ ئیسلامێ د کۆنگرەیەکێ رۆژنامەڤانی دا ئاشکراکر، د سالا بۆری دا رێژەیا تەلاقێ زێدەکربوو و ئێکەتیا زانایان ژی شییایە چەندین ئاریشەیێن جڤاکی چارەسەر بکەت.
دکتۆر عەبدولا وەیسی، سەرۆکێ ئێکەتییا زانایێن ئاینێ ئیسلامێ بۆ خانی نیوز دیارکر: سالا بۆری ژبەر قەیرانا دارایی و ڤایرۆسا کۆڕۆنایێ ھەرێما کوردستانێ د رەوشەکا دژوار دا دەربازبوو و ئێکەتیا زانایێن ئاینی ژی شییایە چەندین چالاکییان ئەنجام بدەت، ژ وان ژی دەرکرنا فه‌توایێن شەرعی و چارەسەرکرنا چەندین ئاریشەیێن خێزانی.
سەرۆکێ ئێکەتییا زانایان ئاشکراکر: ب تنێ د سالا بۆری دا جڤاتا بلندا فه‌توایێ شیایە ٢١ فه‌توایان بۆ سەرانسەری ھەرێما کوردستانێ بده‌ت، ھەروەسا چەندین رۆھنکرن ل دۆر مامەلەیێن کڕین و فرۆتنێ دەرکرینە، چونکە گۆھڕین ب سەر بازاڕی دا هاتییە و چەندین مامەلەیێن نوو یێن کڕین و فرۆتنێ پەیدابووینە.
دکتۆر عەبدولا وەیسی گوت ژی: د سالا بۆری دا ئێکەتیا زانایان زێدەتری ئێک ھزار ئاریشەیێن خێزانی چارەسەر کرینە، مخابن ئاریشەیێن جڤاکی زێدەبووینە و تنێ ب رێیا ئێکەتیا زانایان د سالا بۆری دا ٩٤٧ حالەتێن تەلاقێ تنێ ب رێیا لیژنەیێن فتوایێ ھاتینە تۆمارکرن، ژبلی ئەڤێن دادگەھێ، ئەڤێ چەندێ ژی پێدڤی ب ڤەکۆلینێ یە، چونکە رێژا تەلاقێ سال بۆ سالێ زێدە دبیت.
سەرۆکێ ئێکەتییا زانایان زێدەتر گوت: ئێکەتییا زانایان ٢١٢ ئاریشەیێن جڤاکی چارەسەر کرینه و ب سەدان ئاریشەیێن دی وەکو کڕین و فرۆتنێ و ئاریشەیێن ئەردی و میراتی چارەسەر کرینە، مخابن ھەر ل سالا بۆری ٩٤ مامۆستایێن ئاینێ وەغەرا دووماهیێ کریە.
ھەولێر، قائید میرۆ
