<h3 style="text-align: justify;"><span style="font-size: 18pt;">ئه‌ڤ شه‌ڤه د ئاهه‌نگه‌كا تایبه‌تدا ل پاریسا پایته‌ختێ فره‌نسا خودانێ خه‌لاتێ بالۆن دور یێ سالا 2022ێ دێ ئاشكرابیت كو دێ ژلایێ كوڤارا فرانس فوتبۆل یا فره‌نسیڤه هێته پێشكێشكرن.</span></h3> <h3 style="text-align: justify;"><span style="font-size: 18pt;">ئاهه‌نگا پێشكێشكرنا خه‌لاتێ بالۆن دور دێ ل ده‌مژمێر نه‌هـ و 30 خۆله‌ك ل دووڤ ده‌مێ كوردستانێ ده‌ستپێكه‌ت، 30 یاریكه‌ر بۆ برنا ئه‌ڤى ناسناڤى هاتینه به‌ربژاركرن، و ل پێشییا هه‌موویان كه‌ریم بنزیمه، سادیۆ مانى و محه‌مه‌د سه‌لاح هاتینه دانان، و ل دووڤ پێشبینیان بنزیمه ژ هه‌موو به‌ربژارێن دى نێزیكتره خه‌لاتى بده‌ستڤه‌ببه‌ت، پشتى وه‌رزه‌كێ سه‌ركه‌ڤتى دگه‌ل ریال مه‌دریدێ بووراندى كو ناسناڤێن لیگا و چامپیۆنز لیگێ بده‌ستڤه‌بربوون و ببوو گۆلكارێ هه‌ردو قاره‌مانییان ژى.</span></h3> <h3 style="text-align: justify;"><span style="font-size: 18pt;">خه‌لاتێ یاشین:</span></h3> <h3 style="text-align: justify;"><span style="font-size: 18pt;">هه‌روه‌سا د ئاهه‌نگا فرانس فوتبۆلێدا خه‌لاتێ لیڤ یاشین یێ باشترین گۆلپارێزێ جیهانێ دێ هێته دان.</span></h3> <h3 style="text-align: justify;"><span style="font-size: 18pt;">ل وه‌رزێ بوورى گۆلپارێزێ ئیتالى جیانلویجى دوناروماى بده‌ستڤه‌بربوو، لێ ئه‌ڤ ساله گۆلپارێزێ به‌لجیكى تیبو كورتوا به‌ربژارێ سه‌ره‌كییه ببیته خودانێ خه‌لاتى.</span></h3> <h3 style="text-align: justify;"><span style="font-size: 18pt;">خه‌لاتێ كوبا:</span></h3> <h3 style="text-align: justify;"><span style="font-size: 18pt;">یاریكه‌رێن گه‌نج ژى دێ ده‌رفه‌تا برنا خه‌لاتى دئاهه‌نگا ئه‌ڤ شه‌ڤه‌دا هه‌بیت، كو ناسناڤێ كوبا بۆ باشترین یاریكه‌رێ ژییێ دبن 21 سالییێ دا هێته پێشكێشكرن، هژماره‌كا یاریكه‌رێن گه‌نج هه‌ڤركییێ ل سه‌ر برنا ئه‌ڤى خه‌لاتى دكه‌ن وه‌كو جۆد بێلینگهام و جه‌مال موسیالا، كو ل وه‌رزێ بوورى یاریكه‌رێ گه‌نجێ یانه‌یا به‌رشه‌لۆنا پێدرى بده‌ستڤه‌بربوو.</span></h3> <h3 style="text-align: justify;"><span style="font-size: 18pt;">بالۆندورا كچان:</span></h3> <h3 style="text-align: justify;"><span style="font-size: 18pt;">ژلایه‌كێ دیڤه دئاهه‌نگا فراس فوتبۆلێدا خه‌لاتێ باشترین یاریكه‌را كچ دێ هێته پێشكێشكرن، یاریكه‌را به‌رشه‌لۆنا ئه‌لێكسیا بوتیلاس ل وه‌رزێ بوورى ناسناڤ بده‌ستڤه‌بربوو، و ئێك ژ به‌ربژارێن ئه‌ڤ ساله ژییه.</span></h3>
