نێچیرڤان بارزانى سه‌ره‌خۆشى ل بنه‌مالا شه‌هید زوهێر محه‌مه‌د فایه‌قى كر

سه‌رۆكێ هه‌رێما كوردستانێ په‌یامه‌كا سه‌ره‌خۆشییێ ئاراسته‌یى كه‌سوكارێن نه‌قیب زوهێر محه‌مه‌د فایه‌قى كر، كو ناڤبرى دووهى چارشه‌مبى ل ده‌مێ بجهئینانا ئه‌ركه‌كێ ئه‌منى ل ده‌ڤه‌را گه‌رمیان ژ ئه‌نجامێ كاره‌كێ تیرۆرستى شه‌هیدبوو.

نێچیرڤان بارزانى سه‌رۆكێ هه‌رێما كوردستانێ د په‌یاما سه‌ره‌خۆشییێدا دبێژیت :  سه‌ره‌خۆشییێن خوه‌ ئاراسته‌یى خێزان و كه‌سوكارێن خۆدێ ژێ رازى شه‌هید نه‌قیب زوهێر محه‌مه‌د فایه‌ق ل هێزێن كۆماندویێن كوردستانێ دكه‌ت، كو دووهى ل ده‌مێ بجهئینانا ئه‌ركه‌كێ ئه‌منى ل ده‌ڤه‌را گه‌رمیان ژ ئه‌نجامێ كاره‌كێ تیرۆرستى گیانى خوه‌ ژ ده‌ستدا و شه‌هید بوو، و ژ خودایێ مه‌زن دخوازیت گیانێ وى ب مه‌زنى و دلوڤانییا خوه‌ شاد بكه‌ت و سه‌بر و ئارامییێ ب هه‌موویان بده‌ت.

نێچیرڤان بارزانى دیار ژى كر، ئه‌و داخوازا زوو ساخبوونێ بۆ فه‌رمانده‌ ئاكام عومه‌ر فه‌رمانده‌یێ هێزێن كۆماندویێن كوردستانێ و هه‌ڤالێن وى دكه‌ت، كو ژ ئه‌نجامێ ئه‌وى كارێ تیرۆرستى برینداربووینه‌ و ب مخابنیڤه‌ برینا هنده‌ك ژ وان یا دژواره‌.

هه‌روه‌سا سه‌رۆكێ هه‌رێمێ گوت : ئه‌و دووپات دكه‌ن كو تیرۆر هێشتا مه‌ترسییه‌كا راسته‌قینه‌یه‌ و گه‌فه‌كا جددى ل سه‌ر ئارامى و ئاسایشێ دكه‌ت، له‌وما پێدڤییه‌ هاریكارى و هه‌ماهه‌نگییه‌كا باشتر دناڤبه‌را له‌شكه‌رێ عیراقێ و پێشمه‌رگه‌ى و هێزێن ئێمناهییێدا ب تایبه‌ت ل ده‌ڤه‌رێن مادده‌یێ ( 140 ) یێ ده‌ستوورى هه‌بیت، داكو بشێن پێكڤه‌ باشتر رووبروو تیرۆر و چه‌كدارێن داعشێ ببن و ب هاریكارییا هه‌ڤپه‌یمانییا نێڤده‌وله‌تى ب ئێكجارى ژ ناڤببه‌ن.