ل ڕۆژێن 3،4،5،6 نۆڤێمبه‌را 2022، پارتیا مه كۆنگره‌یێ خوه یێ 14 ل بن درووشمێ (ئازادی، دیموكراسی، داپه‌روه‌ری) ل باژێرێ دهۆكێ ب پشكداریا 1061 ئه‌ندامان گێرا.
كۆنگره‌ی، ب گۆره‌ی به‌رنامه‌یه‌كێ ڕێكخستی ده‌ست ب كارێن خوه كر و پشتی چه‌ند ئایه‌تێن قورئانێ، سروودا نیشتمانی یا ئیراقێ و سروودا ئه‌ی ڕه‌قیب هاتنه پێشكێشكرن.
ل ده‌ستپێكێ سه‌رۆك بارزانی په‌یڤه‌ك پێشكێشكر، تێدا ئاماژه ب وێ چه‌ندێ كر كو ژ ئه‌گه‌رێ شه‌ڕێ داعش و پاراستنا ئێكه‌تیا ئاخا كوردستانێ و ڤایرۆسێ كۆرۆنا، كۆنگره گیروبوو، هه‌روه‌سا ب گشتی باسێ ڕه‌وشا هه‌رێما كوردستانێ و ئیراقێ و ده‌ڤه‌رێ و جیهانێ كر، ب تایبه‌تی د په‌یڤا خوه‌دا ڕۆناهی خسته سه‌ر دو خالان كو جهێ شانازیا وی بوون ل سه‌رده‌مێ كو ئه‌و د پۆستێ سه‌رۆكایه‌تیا هه‌رێما كوردستانێ دا، یا ئێكێ، هنارتنا هێزا پێشمه‌رگه‌ی بۆ پشته‌ڤانیا كۆبانی، یا دوویێ، ئه‌نجامدانا ڕیفراندۆمێ بۆ سه‌ربخوه‌یا كوردستانێ. د پشكه‌كا دی یا په‌یڤا خوه دا سوپاسیا خۆراگریا پێشمه‌رگێن كوردستانێ كر د به‌رگریكرنا وان یا قه‌هره‌مانانه دا ل شه‌ڕێ دژی داعشێ و پاراستنا ئاخا كوردستانێ، هه‌روه‌سا سوپاسیا خه‌لكێ كوردستانێ كر بۆ خۆراگری و پشته‌ڤانیا پێشمه‌رگه‌ی و داموده‌زگه‌هێن په‌یوه‌ندیدار د به‌رهنگاریا وان دا د وی شه‌ڕی دا.
پاشی فلمه‌كێ دیكیۆمێنتاری لسه‌ر وان هه‌ڤالێن سه‌ركردایه‌تیێ كو د ناڤبه‌را كۆنگره‌یێ 13 و ڤی كۆنگره‌ی دا وه‌غه‌ركری هاته نیشاندان، پاشی ده‌سته‌یا سه‌رۆكایه‌تیا كۆنگره‌ی هاته هه‌لبژارتن.
هه‌ر د ڕوونشتنا ئێكێ دا، كۆنگره‌ی ب ته‌ڤایا ده‌نگان ڕێزدار سه‌رۆك بارزانی ب سه‌رۆكێ پارتی دیموكراتی كوردستان هه‌لبژارت، هه‌روه‌سا كۆنگره‌ی باوه‌ری ب جێگرێ ئێكێ و جێگرێ دوویێ یێ سه‌رۆكێ به‌خشی.
پاشی ڕاپۆرتا سیاسی یا جڤاتا سه‌ركردایه‌تیا پارتی هاته خواندن، د ڕاپۆرتێ دا هۆكارێ گیروبوونا كۆنگره‌ی ب ڕۆهنی هاته به‌رچاڤكرن كو سه‌ره‌رای وێ چه‌ندێ ئه‌وا لسه‌ری سه‌رۆك بارزانی ئاماژه پێدای، ڕیفراندۆم و خیانه‌تا 16 ئۆكتۆبه‌رێ و ده‌ره‌نجامێن وێ، هۆكاربوون بۆ پاشخستنا كۆنگره‌ی.
د وێ ڕاپۆرتێ دا، سه‌باره‌ت پارچه‌یێن دی یێن كوردستانێ، ئه‌و هاته به‌رچاڤكرن كو ئه‌م ل گه‌ل داخوازیێن وان یێن ڕه‌واینه د هه‌مان ده‌م دا، داخواز ژ هێزێن سیاسی یێن هه‌ر سێ پارچه‌یێن كوردستانێ هاته كرن سه‌رده‌میانه خه‌باتا خوه یا مه‌ده‌نی بكه‌ن، داخواز ژی ژ هه‌رسێ وه‌لاتێن جیران هاته كرن كو سنوورێ جوگرافی، تێگه‌هشتنا دبلۆماسی، به‌رژه‌وه‌ندیا هه‌ڤپشك یا ئابووری و بازرگانی و كه‌لتووری و جڤاكی مه پێكڤه یێن هه‌ین، ب كریار هزر د چاره‌سه‌ریا سیاسی یا پرسا كوردی دا بكه‌ن، چاره‌سه‌ریه‌كێ كو ئاشتیێ و سه‌قامگیریێ و ڤه‌ژاندنا ده‌ڤه‌رێ ب گشتی د دووڤ خوه دا بینیت.
لسه‌ر ئاستێ ئیراقێ ژی هاتیه كو پارتیا مه ب ڕێیا په‌رله‌مان و حوكمه‌تا ئیراقا فیدرال كار دكه‌ت لسه‌ر قانوون دانان و كاراكرن و بجهئینانا كۆمه‌كا قانوونێن گرنك بۆ پشته‌ڤانیا سیسته‌مێ فیدرالی و دیموكراسی ل ئیراقێ، وه‌كو د دستوورێ ئیراقا فیدرالی دا هاتی.
ل ڕوونشتنا دوویێ یا هه‌مان ڕۆژ دانوستاندنێن هوور لسه‌ر ڕاپۆرتێن وان هاته كرن و ب تیبینی و سه‌رنجێن ئه‌ندامێن كۆنگره‌ی هاتنه زه‌نگینكرن، ل ڕوونشتنا ئێكێ یا ڕۆژا دوویێ یا كۆنگره‌ی، پشتی خواندنا ڕاپۆرتان، ده‌نگدان لسه‌ر هاته كرن و ژ ئالیێ كۆنگره‌ی ڤه هاتنه په‌سه‌ندكرن.
وه‌لاتیێن به‌رێز…
هه‌ڤالێن خه‌باتكر..
كۆنگره‌ی ب پێتڤی زانی د ڤێ قۆناغێ دا، پێداچوونه‌كا هوور ب په‌یڕه‌وێ ناڤخوه‌یی دا بكه‌ت، ژ ڕوویێ هه‌یكه‌لیه‌تی و رێكخستنێ و په‌یوه‌ندیا د ناڤبه‌را ئۆرگانه‌یاندا، ب شێویه‌ه‌كی د گه‌ل واقعێ ئه‌ڤرۆ یێ كارێ حزبایه‌تی بگونجیت، ژ ئالیه‌كی دی ڤه د په‌یڕه‌وێ ناڤخوه‌یی دا ناڤێ جڤاتا سه‌ركردایه‌تیێ بۆ كۆمیته‌یا ناڤین هاته گوهارتن، هه‌روه‌سا گوهۆڕین د پشكه‌ك ژ هه‌یكه‌لیه‌تێ حزبی دا هاته ئه‌نجامدان و ناڤێ جڤاتا سه‌ركردایه‌تیا پارێزگه‌هێ بۆ (مه‌كته‌با ڕێكخستنا پارێزگه‌هێ) هاته گوهۆڕین، هه‌روه‌سا بڕیارا دامه‌زراندنا جڤاتا بلند یا خه‌باتكه‌ران هاته دان. گوهۆڕینه‌كا دی ژی د په‌یڕه‌وی دا هاته كرن ئه‌وژی بلندكرنا ڕێژه‌یا پشكداریا ئافره‌تێ د كۆمیته‌یا ناڤین دا ب جۆره‌كی ژ 15% كێمتر نه‌بیت.
ل ڕۆژا دوویێ، سه‌رۆك بارزانی پێشنیازا 10 هه‌ڤالان خسته به‌رده‌م كۆنگره‌ی، هه‌ر 10 هه‌ڤال ب ده‌نگێن ڕاسته‌وخوه و ئاشكرا بۆ كۆمیته‌یا ناڤین هاتنه هه‌لبژارتن.
پاشی، كۆنگره‌ی ده‌رگه‌هێ خوه به‌ربژاركرنێ بۆ كۆمیته‌یا ناڤین ڤه‌كر كو (129) هه‌ڤالان خوه به‌ربژاركر بۆ 41 ئه‌ندامێن كۆمیته‌یا ناڤین و 9 یه‌ده‌ك. ل رۆژێن سیێ و چارێ ژی دا پرۆسه‌یا هه‌لبژارتنا ئه‌ندامێن كۆمیته‌یا ناڤین و ژێك جوداكرن و خواندنا ده‌نگان ده‌ستپێكر كو ژ ئالیێ كۆمسیۆنا بلند یا سه‌ربخوه یا هه‌لبژارتنان ل ئیراقێ و 7 دادوه‌رێن هه‌رێما كوردستانێ هاته ئه‌نجامدان.
جهێ باسكرنێ یه كۆنگره‌ی كۆمه‌كا پره‌نسیبان و ستراتیژیه‌تا پارتی د چه‌ندین بوارێن جودا جودا دا په‌سه‌ندكر ژوان كاركرن ژ پێخه‌مه‌ت بهێزكرنا سیسته‌مێ په‌رله‌مانی و ب دیموكراتیزه‌كرنا سیسته‌مێ حوكمڕانیێ ب پشتبه‌ستن ب پره‌نسیبێن: گه‌ل ژێده‌رێ ده‌ستهه‌لاتێ یه، ژێك جوداكرن و هه‌ڤسه‌نگیا ده‌ستهه‌لاتان، سه‌ربخوه‌یی و كاراكرنا ده‌زگه‌هان، سه‌روه‌ریا قانوونێ و پاراستنا ماف و ئازادیان و مافێ ئافره‌تێ، هه‌روه‌سا ڕێزگرتن ل مافێن مرۆڤی و ئازادیێن بنه‌ره‌تی و ڕێزگرتن ل پره‌نسیبێن شه‌فافیه‌ت و لێپرسین و سزا و پاداشت د حوكمڕانیا هه‌رێمێ و ئیراقێ دا.
د پشكه‌كا دی دا دووپاتی لسه‌ر وێ چه‌ندێ هاته كرن كو پێدڤیه چه‌سپاندنا مودێلێ حوكمڕانیا باش و به‌رسڤده‌ر بۆ وێ ئێكێ باشترین خزمه‌تگوزاریێن گشتی پێشكێشی گه‌لێ كوردستانێ بكه‌ت.
لسه‌ر ئاستێ مرۆڤی و جڤاكی دا، پارتیا مه كار دكه‌ت بۆ پێشڤه‌برنا كه‌لتوری، كو ب جۆره‌كی ڕه‌نگڤه‌دانا ڕاسته‌قینه یا جڤاكێ كوردستانی بیت و فره‌كه‌لتوری و فره‌ئایینی و هه‌ڤدو قه‌بوولكرن و ڕێزگرتن ل جوداهیێن مه تێدا به‌رجه‌سته بیت، ئه‌ڤه ژی ژ پێخه‌مه‌ت بلندكرنا ئاستێ هزری و هشیاری و نیشتمانی یا كوردستانیان بیت.
لسه‌ر ئاستێ كوردستانێ، كۆنگره‌ی دووپاتی ل ئێكڕێزی و په‌یوه‌ندیێن دۆستانه ل گه‌ل هه‌موو ئالیان كر و پێدڤی زانی به‌رپه‌ره‌كێ نوو بۆ په‌یوه‌ندیان ڤه‌كه‌ت و كێشه و گرفت ب دانوستاندنێ و تێكگه‌هشتنێ بهێنه چاره‌سه‌ركرن.
هه‌روه‌سا لسه‌ر ئاستێ ئیراقێ ژی كۆنگره‌ی دووپاتی لسه‌ر چاره‌سه‌ركرنا كێشه‌یێن هه‌لاویستی و نه‌چاره‌سه‌ركری و بجهئینانا ڕێككه‌فتنا سیاسی و دامه‌زراندنا حوكمه‌تێ كو ل گه‌ل ئالیێن سیاسی یێن ئیراقی هاتیه ئه‌نجامدان كر.
وه‌لاتیێن به‌رێز ..
هه‌ڤالێن خه‌باتكه‌ر..
پارتی دیموكراتی كوردستان سه‌ركه‌فتنا كۆنگره‌ی ب سه‌ركه‌فتنا خواست و به‌رژه‌وه‌ندیا گه‌لێ كوردستانێ دزانیت، ژ به‌ر كو پارتی به‌رده‌وام و ژ نوكه و پێڤه ژی ئامرازه‌كا خه‌باتا جه‌ماوه‌ری یا گه‌لێ مه‌یه بۆ بده‌ستڤه‌ئینانا مافێن ڕه‌وا یێن نه‌ته‌وا كورد و گه‌لێ كوردستانێ، له‌وما پارتیا مه پیرۆزباهیێ ل خه‌لكێ كوردستانێ و هه‌ڤالێن خه‌باتكه‌ر دكه‌ت و سۆزێ دووپات دكه‌ت وه‌كو به‌رده‌وام پارێزه‌را ده‌ستكه‌فتێن گه‌لی و بده‌ستڤه‌ئینه‌را ماف و پاراستنا ده‌ستكه‌فتێن دستووری و نیشتمانی و نه‌ته‌وی یێن وی بیت كو درێژه‌پێده‌را ڕێبازا بارزانیێ نه‌مره.
كۆنگره‌ی ب ته‌ڤایا ده‌نگان ته‌خویلا سه‌رۆك بارزانی كر بۆ دیاركرنا هه‌ڤاله‌كی ژ كوردێن ئێزدی بۆ كۆمیته‌یا ناڤین یا پارتیا مه.
