فەرماندەکێ پێشمەرگەیی: سوپایێ عیراقێ شیانێن بەرھنگاربوونا داعشێ نینن

ئاژانسا خانی ، تایبەت:

فەرماندێ فەرماندا کەرکووکێ یا ھێزێن پێشمەرگەیی ھۆشداریێ لدۆر لڤینێن داعشێ ددەت و دبێژیت، سوپایێ عیراقێ شیانێن بەرھنگاربوونا چەکدارێن داعش نینن و ناچنە وان دەڤەرێن داعش تێدا.

لیوا حەمە رێگر، فەرماندێ فەرماندا کەرکووک بۆ ئاژانسا خانی دیار کر” ئەو دەڤەرێن بەری روودانێن ١٦ی ئۆکتۆبەرێ ھێزێن پێشمەرگەیی تێدابوون نوکە ڤالاھییا ئەمنی تێدایە و نە ھێزێن پێشمەرگەیی ماینە بۆ پاراستنا وان دەڤەران و چ ھێزا شیان نینن رەوشا وان کۆنتڕۆل بکەت، شانەیێن گرۆپێن تیرۆرستی یێن داعشێ مفا ل وێ ڤالاھیا ئەمنی دیتییە و بەردەوام چه‌كدارێن داعشێ ل دەڤەرێن دەوروبەری کەرکووکێ لڤینان دکەن، چەکدار ل دەلیڤەکێ دگەڕن بۆ کریارێن تیرۆرستی ھەر وەکی بەری چەند رۆژان چار چەکدارێن ھێزێن عێراقی كۆشتین.

ناڤهاتی گۆت ژی” سوپایێ عیراقێ ئەگەر بزانیت چەکدارێن داعش ل دەڤەرەکێ ھەنە ئەو ناچنە وێ دەڤەرێ و نەشێن بەرھنگاری چەکدارێن داعشێ ببن، نوکە ل باشوور و رۆژئاڤایێ کەرکووکێ چەکدارێن داعش پەیدا بووینە و بوویە ھێلینا داعشێ، ئەگەر ھێزێن پێشمەرگەیی نەھێنە ڤەگەڕاندن بۆ دەڤەرێن کوردستانی و کەرکووکێ پێشبینی دھێتە کرن رەوش بەرەف ئالۆزیێن زێدەتر بچیت.