سهرۆكێ ههرێما كوردستانێ دگهل سهرۆكێ جڤاتا بلند یا دادوهرییا عیراقێ كۆمبوو و دووپاتى ل گرنگییا هاریكارییا ههڤپشك دناڤبهرا دهستههلاتان و لایهنێن سیاسى و پێكهاتهیێن عیراقێدا بۆ رووبرووبوونا ئالوزییان و گههاندنا وهلاتى ب كهنارهكێ ئارام كر.
ئهڤرۆ 22ى چریا دووێ یا 2022ێ نێچیرڤان بارزانى سهرۆكێ ههرێما كوردستانێ ل بهغدا دگهل فایێق زێدان سهرۆكێ جڤاتا بلند یا دادوهرییا عیراقێ كۆمبوو.
ل دووڤ راگههاندنهكا سهرۆكایهتییا ههرێما كوردستانێ، د كۆمبوونێدا هزر و بیر ل دۆر میكانیزما پشتهڤانیكرنێ ل دادوهرییێ و دابینكرنا ههموو پێدڤییێن سهركهڤتنا كارێ دادگههان ل عیراقێ و ههرێما كوردستانێ هاتنه لێك گهورین، و ههردوو لایان دووپاتى ل گرنگییا هاریكارییا ههڤپشك دناڤبهرا دهستههلاتان و لایهنێن سیاسى و پێكهاتهیێن عیراقێدا بۆ رووبرووبوونا ئالوزییان و گههاندنا وهلاتى ب كهنارهكێ ئارام كر.
وهكو دراگههاندنێدا هاتى، نێچیرڤان بارزانى سهرۆكێ ههرێما كوردستانێ دووپاتى ل گرنگییا رۆلێ دهستههلاتا دادوهرى ل سهقامگێرى و رێڤهبرنا وهلاتیدا كر، ب تایبهتى ئاماژه ب ئامادهیى و رۆلێ كارا یێ سهرۆكێ جڤاتا بلند یا دادوهرییا عیراقێ كر.
ههر دچارچووڤێ سهرهدانێدا نێچیرڤان بارزانى سهرۆكێ ههرێما كوردستانێ دگهل محهمهد تهمیم وهزیرێ پلاندانانا عیراقێ ل ههڤپهیمانییا سیاده كۆمبوون، و ههردوو لایان داكوكى ل ئێكرێزی و تهباییێ دناڤبهرا هێز و پێكهاتهیێن نیشتیمانییێن عیراقێدا بۆ دهربازكرنا سهختییان دههموو بواراندا كر.
