د راگەھاندنەکا وەزارەتا کاروبارێن شەھید و ئەنفالکریێن حکومەتا ھەرێما کوردستانێ دا ھاتییە: وەزیرێ کاروبارێن شەھید و ئەنفالکرییان، ئەڤرۆ رۆژا چارشەمبی ٦-١-٢٠٢١ێ دگەل لێژنێن نوو پێداچوون د لیستا زیندانیێن سیاسی دا کر، کو ئەو لێژنە ژی ل دووڤ یاسایێن چاکسازیێ، کو ژ نوونەرێن سەرۆکایەتییا جڤاتا وەزیران و وەزارەتا دارایی و ئابووری و وەزارەتا کاروبارێن شەھید و ئەنفالکرییان پێکھاتبوون.
د وێ کومبوونێ دا وەزیرێ کاروبارێن شەھید و ئەنفالکرییان دوپاتی ل سەر وێ چەندێ کرییە کو پرۆسێسا چاکسازیێ د لیستا زیندانکرییان و زیندانیێن سیاسیێن کوردستانێ دێ ھێتە کرن، بۆ ھندێ ژی ل دووڤ یاسایێ پتر خزمەتا ئەڤێ تەخێ بکەن کو گەلەک قوربانی ژبۆ کوردستانێ داینە.
د کومبوونێ دا ژی بریار ھاتەدان، ل دەستپێکێ پێداچوونێ د لیستا وان زیندانییان و گرتیێن سیاسی دا بکەن کو ١٠ سالێن وەرگرتنا مینحەیێن وان تەمام بووینە و وان چ مووچەیەکێ دی ژی نینە، داکو ل دووڤ وێ بریارا سەرۆکێ حکومەتا ھەرێما کوردستانێ مینحەیا وان یا بەردەوام بیت.
ئاماژە ب وێ چەندێ ژی کرییە کو ناڤ و ھژمارە و رێزبەندی و دۆسیەیێن زیندانیێن سیاسی، پێشکێشی سەرۆک و ئەندامێن لێژنان ھاتینە کرن.
