لدووڤ نڤێسینگهها سهرۆكایهتییا هنگاریا، سهرۆكا وان دێ ههتا رۆژا شهمبى ل عیراقێ مینیت، بریاره دوى ماوهیدا سهرهدانا هێزێن هنگاریا بكهت، كو ژ چارچووڤێ ههماههنگییا نێڤدهولهتى دژى داعشێ ل ههرێما كوردستانێ و عیراقێ هاتینه جێگیركرن.
ههروهسا سهرۆكا هنگاریا دێ سهرهدانا ئهوان پرۆژهیێن مرۆڤى كهت یێن كو ب سهرپهرشتییا بهرنامهیێ هاریكارییا هنگاریا ل عیراق و ههرێما كوردستانێ هاتینه بجهئینان.
هنگاریا ژ سالا 2014ێ وهره ئهنداما ههڤپهیمانییا ناتویه، و ل دووڤ ئاخڤتنێن وهزیرێ وێ یێ دهرڤه پیتهر سیارتوى، 170 سهربازێن وان ل ههرێما كوردستانێ و عیراقێ ههنه، و هژمارهكا دى یا سهربازێن وان ژ چارچووڤێ ئهركێ ناتویێ، راهێنانان ب پێشمهرگه و هێزێن ئێمناهییا عیراقێ دكهن.
ل دووڤ سایتێ ههڤپهیمانییا نێڤدهولهتییا دژى داعشێ، ژ سالا 2014ێ وهره، هنگاریا دوو ملیۆن و 200 هزار یورۆ وهكو هاریكارى بۆ چارهسهركرنا ئهوان ئاریشه و قهیرانێن ژ ئهنجامێ هێرشێن داعشێ پهیدابووین، داینه عیراقێ.
ژبلێ وێ، هنگاریا 19 ملیۆن و 500 هزار دولار وهكو هاریكارییێن مرۆڤى ب كوردێن ئێزیدى و پێكهاتهیێن كریستیانان ل عیراق و سووریا داینه، ههروهسا 25 سهربازێن عیراقى ل ناڤهندێن نوشدارى یێن هنگاریا چارهسهركرینه.
