ئه‌ڤرۆ 17ى كانوونا ئێكێ یا 2022ێ ل باژێرێ سلێمانییێ و ب به‌رهه‌ڤبوونا ژماره‌یه‌كا به‌رچاڤ یا به‌رپرسێن بلند یێن حكومى و حزبى و له‌شكه‌رى و دیپلۆماتكار و نوونه‌رێن وه‌لاتان و خێزان و كه‌سوكارێن وى، رێوره‌سمێن پێشوازیكرنا ته‌رمێ شه‌هید ئاكام عومه‌ر فه‌رمانده‌یێ هێزێن كوماندو برێڤه‌چوون، كو به‌رى دوو هه‌یڤان د ئه‌ركه‌كێ ئه‌منیدا دژى تیرۆرستان ل گه‌رمییان شه‌هید ببوو.
خێزان و كه‌سوكار و هه‌ڤال و هه‌ڤسه‌نگه‌رێن شه‌هید ئاكامى،
ئاماده‌بوویێن به‌رێز،
سلاڤ ل هه‌وه بن،
هه‌موو لایه‌ك بخێر بهێن
ئه‌ڤرۆ ئه‌م هه‌موو پێكڤه دئه‌ڤان رێوره‌سمێن خه‌مگیندا د پشكدارین بۆ هندێ رێز و پێزانینان بۆ خه‌بات و قوربانیدانا گه‌نجه‌كێ فه‌رمانده نیشانبده‌ین و هه‌ڤخه‌می و هه‌ڤسوزییێ دگه‌ل خێزان و كه‌سوكار و هه‌ڤسه‌نگه‌ر و هه‌ڤالێن وى دووپاتبكه‌ین، ئه‌ڤى فه‌رمانده‌یێ ژێهاتى، د ئه‌ركێ نیشتیمانییێ پاراستنا كوردستانێدا گیانێ خوه به‌خشكر و شه‌هیدبوو، شه‌هید ئاكام عومه‌ر فه‌رمانده‌یه‌كێ ب وێره‌ك و چاڤ نه‌ترس یێ هێزێن كوماندو، وه‌كو هه‌ڤسه‌نگه‌ر و هه‌ڤالێن وى ڤه‌دگێرن، هه‌رده‌م ل رێزێن پێشییا به‌ره‌ڤانیكرنێ ژ كوردستانێ بوو و قه‌د نه‌هێلایه پێشمه‌رگه و ئه‌ندامێن دى یێن هێزا وى، پێش ئه‌وى بكه‌ڤن و رووبروونێ دگه‌ل دوژمنى بكه‌ن.
ئه‌و ب گیانه‌كێ نیشتیمانپه‌روه‌ر و ئاكار و ره‌وشته‌كێ بلند و باوه‌رییه‌كا موكوم یا وه‌لاتێ خوه، هه‌رده‌م ئاماده‌ی قوربانیدانێ بوو، و دووماهیك جار ژى هه‌ر دئه‌ركێ به‌ره‌ڤانیكرن و پاراستنا كوردستانێدا ب دژى تیرۆرستان شه‌هید بوو، دووباره پرسه و سه‌ره‌خۆشییێن خوه یێن كوور ئاراسته‌یى خێزان و كه‌سوكار و هه‌ڤسه‌نگه‌ر و هه‌ڤالێن وى دكه‌ین و هه‌ڤپشكێن خه‌م و ئازارێن واینه، ژ خودایێ مه‌زن دخوازین گیانێ شه‌هید ئاكامى ب مه‌زناهى و دلوڤانییا خوه شاد بكه‌ت و ئارامى و بهێن فره‌هییێ ب هه‌موویان بده‌ت، هه‌روه‌سا ل ڤێرێ سلاڤان بۆ گیانێ پاقژێ هه‌ڤالێ شه‌هیدى، شه‌هید مولازم زوهێرێ هه‌ڤسه‌نگه‌ر دهنێرین.
ئاماده‌بووییێن به‌رێ.
مێژوویا گه‌لێ كوردستانێ، مێژوویه‌كا پرى سه‌روه‌رییه و ب قوربانیدان و خوینا هزاران شه‌هیدان و روندك و ئازارێن هزاران ده‌یك و بابێن دل سووتى یێن ئه‌ڤى وه‌لاتى هاتییه تۆماركرن، ئازادى و ده‌ستكه‌ڤتێن ئه‌ڤرۆ یێن گه‌لێ كوردستانێ، قه‌واره‌یێ سیاسى و فیدرالییێ هه‌رێما كوردستانێ به‌رهه‌مێ ره‌نج و خه‌بات و قوربانیدانه‌كا بێ وێنه یا هه‌موو پێكهاته‌یێن گه‌لێ مه‌یه، ئه‌م هه‌موو قه‌ردارێن خوینا شه‌هیدان و ئازار و قوربانییێن خێزانێن وانین، ل ڤێرێ ب رێز و حورمه‌تڤه هزرا ئه‌وان قاره‌مانان دكه‌ین، كو ب گیانێ خوه یێ پاقژ ئاخ و گه‌لێ كوردستانێ پاراستن، باشترین وه‌فادارى بۆ شه‌هید و كه‌سوكارێن وان یێن سه‌ربلند، پاراستنا ئه‌وان ده‌ستكه‌ڤتایه یێن گه‌لێ كوردستانێ ب خوینا ئه‌وان بده‌ستڤه‌ئیناین.
ئه‌ڤرۆد ده‌مه‌كیدا، ده‌ڤه‌ر ب گشتى د ره‌وشه‌كا ئالۆز و نه‌ئارامدا ده‌رباز دبیت، هه‌رێما كوردستانێ به‌رده‌م گه‌ف و مه‌ترسییێن جددییه، و ژ هه‌موو ده‌مێن دى پتر پێدڤى ب ئێكرێزى و ته‌بایى و ئێك و دوو قه‌بوولكرن و پێكڤه كاركرنا هه‌موو لایه‌ن و هێز و پێكهاته‌یان ب گشتى و ئێكرێزییا پارتى و ئێكه‌تییێ ب تایبه‌تى هه‌یه، مان و سه‌ركه‌ڤتن و پاراستنا ده‌ستكه‌ڤتێن هه‌رێما كوردستانێ ب تنێ دێ ب ته‌بایى و ئێكرێزیا مه بیت، هێز و ئاماده‌یى و سه‌نگ و گرانییا مه ل به‌غدا و ل ده‌ڤ هه‌ڤپه‌یمان و دوستێن مه یێن جیهانى، دێ ب ته‌بایى و ئێكرێزییا مه بیت.
ژێكڤه‌بوون و دووركه‌ڤتن و ناكوكى و ره‌تكرنا ئێك و دوو، شكه‌ستنا مه هه‌موویان و شكه‌ستنا هه‌رێما كوردستانێ و هه‌موو هێز و لایه‌ن و پێكهاته‌یانه، پارتى و ئێكه‌تى ب تایبه‌تى دێ ب ئێكرێزى و ته‌باییێ سه‌ركه‌ڤن، سه‌ركه‌ڤتن و شكه‌ستنا مه هه‌موویان پێكڤه‌یه، ل ئێكرێزى و ته‌باییێ، ئه‌و هه‌موو و هه‌موو گه‌لێ كوردستانێ ب هه‌موو پێكهاته‌یێن خۆڤه، دێ د سه‌ركه‌ڤتى بن، ل نه‌ته‌بایى و ژێكڤه‌بوون و ئێك و دوو شكاندنێ و ناكوكییان و ره‌تكرنا ئێك و دوو، ئه‌م هه‌موو دۆرایى و شكه‌ستینه.
له‌وما ئه‌ڤرۆ د ئه‌ڤان رێوره‌سماندا جاره‌كا دى داخوازێ ژ لایه‌ن و هێزێن سیاسى دكه‌ین، ئاریشه و ناكوكییان بده‌نه لایه‌كى و ب دانوستاندن و لێكتێگه‌هشتنێ چاره‌سه‌ربكه‌ن، ئێكرێزى و ته‌باییێ بپارێزن، بلا پاراستنا ده‌ستكه‌ڤتان و فیدرالى و كاركرن ژ پێخه‌مه‌ت نوكه و پاشه‌رۆژه‌كا باشتر بۆ گه‌لێ كوردستانێ، مه هه‌موویان پێكڤه كۆمبكه‌ت.
جاره‌كا دى سلاڤ ل گیانێ پاقژێ شه‌هید ئاكام عومه‌ر و هه‌موو شه‌هیدێن كوردستانێ، سلاڤ ل هه‌موو پێشمه‌رگه و قاره‌مانان و هێزێن ئێمناهییا كوردستانێ كو هه‌موو ده‌مان گیانێ خوه بۆ پاراستنا وه‌لاتى دكه‌نه قوربانى.
