ده‌سته‌یا ده‌ستپاكییا عیراقێ چار سه‌خته‌كارى ل فه‌رمانگه‌هێن پارێزگه‌ها دیاله ئاشكراكرن و دبێژیت: دوو تیرۆرست ب شه‌هید هاتینه هژمارتن و زێده‌تر ژ 50 ملیۆن دیناران بۆ هاتینه خه‌رجكرن، هه‌روه‌سا 44 كه‌س ب سه‌خته بووینه ماموستایێن وانه‌بێژ، مور و ئیمزایێن رێڤه‌به‌رێ كۆمپانییا به‌لاڤكرنا به‌رهه‌مێن نه‌فتێ ل دیاله هاتینه سه‌خته‌كرن و پاره‌یێ نه‌خۆشخانه‌یا فیتێرنه‌رى ل دیاله هاتییه دزین.
فه‌رمانگه‌ها لێكۆلینان ل ده‌سته‌یا ده‌ستپاكییا عیراقێ دراگه‌هاندنه‌كێدا به‌لاڤكر، تیما كارێ ئوفیسا لێكۆلینێن دیاله دوو مامه‌له‌یێن سه‌خته د لژنه‌یا قه‌ره‌بووكرنا شه‌هید و زیان ڤێكه‌ڤتییێن كریارێن تیرۆرستى و له‌شكه‌ریدا ل پارێزگه‌ها دیاله ئاشكراكرن، و داخوازكرییێن گرۆپێن تیرۆرستى مامه‌له‌یێن سه‌خته بۆ هاتینه درووستكرن، و ب شه‌هید هاتینه هژمارتن و كوژمێ 50،863،700 دیناران بۆ هاتینه خه‌رجكرن.
هه‌روه‌سا دیاركر، تیمه‌كا وان چوویه رێڤه‌به‌رییا په‌روه‌رده‌یا دیاله به‌شێ میلاكات، و فه‌رمانه‌كا كارگێری یا سه‌خته د لیسته‌یا وانه‌بێژێن رێڤه‌به‌رییا په‌روه‌رده‌یا دیاله‌دا ئاشكراكرییه، كو 44 ناڤ دلیسته‌یا وانه‌بێژاندا زێده‌كرینه و ناڤێ وان د فه‌رمانا كارگێریدا نینه.
زێده‌تر دراگه‌هاندنا فه‌رمانگه‌ها لیكۆلینێن ده‌سته‌یا ده‌ستپاكییا عیراقێدا ئاماژه ب هندێ هاتییه دان، فه‌رمانگه‌ها وان ئاشكراكرییه كو مور و ئیمزایێن رێڤه‌به‌رێ كۆمپانییا به‌لاڤكرنا به‌رهه‌مێن نه‌فتێ لقا دیاله هاتینه سه‌خته‌كرن، ب مه‌ره‌ما خه‌رجكرنا به‌رهه‌مێن نه‌فت و گازێ ب موله‌تا سه‌خته، و ده‌ست ب سه‌ر 57 داخوازى و بریكارنامه‌یێن گاز و نه‌فتێ و 26 داخوازییێن موه‌لیده‌یان ل كۆمپانییا به‌لاڤكرنا به‌رهه‌مێن نه‌فتێ هاتییه گرتن.
هه‌روه‌سا ده‌ست ب سه‌ر لیسته‌یا باوه‌رنامه‌یێن ساخله‌می و پسووله‌یێن وه‌رگرتنا باج و رسووماتێن نه‌خۆشخانه‌ی فیتێرنه‌رییا دیاله‌دا هاتییه گرتن، كو ل گولانا سالا 2022 هه‌تا چریا ئێكێ یا 2022ێ ده‌ستكارى تێدا هاتییه كرن و پاره هاتییه به‌رزه‌كرن.
