جڤاتا وەزیرێن عیراقێ دەربارەی پشکا خوارنێ دوو بڕیار دەرکرن

جڤاتا وەزیرێن عیراقێ دکۆمبوونا خۆ یا ئاسایی دا، گوتوبێژ لسەر چەند دووسەیان کرن، ژ وان ژی رەوشا ئەمنی یا پارێزگەها کەرکووکێ.

ئه‌ڤرۆ دوو شەمبی 19 کانوونا ئێکێ 2022، ل گۆرەی ڕاگەهاندنەکا جڤاتا وەزیرێن عیراقێ، د کۆمبوونا ئەڤرۆ دا، وەزیرێ ناڤخۆ یێ عیراقێ دەربارەی ڕەوشا ئەمنی یا پارێزگەها کەرکووکێ و هێرشێن لسەر هێزێن ئەمنی ل دەڤەرێن وێ پارێزگەهێ، رۆهنکرن ژ ئەگەرێن روودانان و بجهئینانا رێکاران بۆ دووبارە نەبوونێ پێشچاڤکرن.

 ل گۆرەی ڕاگەهاندنێ، محەمەد شیاع سوودانی، سەرۆکوەزیرێن عیراقێ، وەزارەتا بازرگانی ڕاسپارد بۆ هاریکاریکرنا کۆمپانییێن کەرتێ تایبەت، کو پشکا خوارنێ لسەر ئاوارێن کەمپێن (خازر، حه‌سه‌ن شام، ئیسان، یوتو و مام ره‌شان) دابه‌ش بكه‌ن، كو ژ 22 ماددێن جۆراو جۆر یێن خوارنێ پێكدهێن.

هه‌روەسا جڤاتا وەزیرێن عیراقێ بڕیار دا خێزانێن کێم دەرامەت و ئەوێن ل تۆرا پاراستنا جڤاکی مفادار دبن ژ پشکا خوارنێ، لسەر ئەرکێ وەزارەتا بازرگانی بهێنە زێدەکرن.

قەبارێ وان ماددێن خوارنێ یێن کو هاتینە زێدەکرن( ئێک کیلۆیا شەکرێ، ئێک کیلۆیا زەیتێ، 200 گرامێن چایێ، 250 گرامێن شیری، ئێک کیلۆیا ئاری( بۆ هەر کەسەکی.

هەر د وێ کۆمبوونێ دا، جڤاتا وەزیرێن عیراقێ بڕیار دا ب هەلوەشاندنا بڕیارا دامەزراندنا ( عەلی جاسم ئەلیاسری)، جێگرێ سەرۆکێ دەستەیا دەرگەهێن سنووری.