ئەڤرۆ ب بەرھەڤبوونا زەکییا سەید سالح بریکارا وەزارەتا کار و کاروبارێن جڤاکی ھاریکاری ب سەر ھژمارەکا ھەژار و خوەدان پێدڤیێن تایبەت یێن دەڤەرا بەرواری بالا ھاتە بەلاڤکرن. ھاریکاریێن کو ھاتینە دابەشکرن بریتی بوون ژ ٢٠٠ کارتۆنێن زەیتی و ٢٠ عەرەبانەیێن خوەدان پێدڤیێن تایبه‌ت.
خانم زەکییا سەید سالح بریکارا وەزارەتا کار و کاروبارێن جڤاکی بۆ خانی نیوز راگەھاند: ئەو خۆشحالە ل دەڤەرەکێ ئامادەبوویە کو ب درێژاھییا دیرۆکێ و شۆرەشێن کوردی تووشی دەردەسەریێ بووین و قوربانی داینە، ھەروەسا خەلکێ وێ نەھامەتی دیتینە و تووشی ئەنفالکرنێ و وێرانکرنا گوند و دەڤەرێن خوە بووینە.
ناڤھاتی گۆت ژی: ئەو چاڤدێرییا خودان پێدڤیێن تایبەت ل ھەمی دەڤەرێن کوردستانێ ب ئەرکێ خۆ دزانن، ئەڤرۆ ژی رابووینە ب دابینکرنا ھندەک کەرەستێن بچووک بۆ خوەدان پێدڤیێن تایبەت و ھەژارێن دەڤەرێ.
بریکارا وەزارەتا ناڤھاتی راگەھاند ژی: د سه‌ره‌دانا خۆدا بۆ وێ ده‌ڤه‌رێ وان ئامیرێن نیشاندانا فلمێن دیکیۆمێنتاری وەکو کۆمپیۆتەر و داتاشۆ و ئامیرەکێ چاپکرنێ بۆ قوتابخانا بریفکا دابینکرینە.
زەکییا سەید سالح بۆ خانی نیوز ئاشکەرا کر کو د پلانا وەزارەتا کار و کاروبارێن جڤاکی دا ھەیە پرۆژەیێ قەرزێ بچووک پێشکێشی خوەدان پێدڤیێن تایبەت بکەن ژ بۆی کو پتر رۆلێ خۆ د ناڤ جڤاکی دا ببینن.
ژ لایەکێ دیڤە د. شێرزاد ھرورێ رێڤەبەرێ گشتی یێ چاڤدێری و گەشە پێدانا جڤاکی ل پارێزگەھا دھۆکێ گۆت: ئەڤ ھاریکارییە دێ د بەردەوام بن و د پلانێن وان دا ھەیە ھندەک پرۆژەیێن دى بۆ خوه‌دان پێدڤیێن تایبه‌ت ل ڤێ دەڤەرێ بھێنە ئەنجام دان .
