په‌یامه‌ك ژ سه‌رۆك بارزانى بۆ رایا گشتییا عیراقێ و كوردستانێ

سه‌رۆك بارزانى په‌یامه‌ك ل دۆر نووترین بریارا دادگه‌ها فیدرالی ب دژى هه‌رێما كوردستانێ به‌لاڤكر.

ده‌قێ په‌یاما سه‌رۆك بارزانى

ب ناڤێ خۆدایێ مه‌زن و دلوڤان

جهێ مخابنییێ یه‌ جاره‌كا دى دادگه‌ها فیدرالییا عیراقێ هه‌ولیسته‌كێ دوژمنكارانه‌ به‌رامبه‌رهه‌رێما كوردستانێ نیشاندا، و رێگرێ ل هنارتنا پاره‌ی بۆ هه‌رێما كوردستانێ كر، كو بریاربوو ژلایێ حكومه‌تا فیدرالڤه‌ بۆ هه‌رێما كوردستانێ بهێته‌ هنارتن.

ل ڤێرێ مه‌ره‌م پاره‌ نینه‌، به‌لكو ئاریشه‌یا سه‌ره‌كییا پێشلكرنا ماف و پره‌نسیپایه‌، هه‌موو لایه‌ن ئاگه‌هدارن كو پشكدارییا مه‌ د هه‌ڤپه‌یمانییا ئیداره‌یا ده‌وله‌ت و پێكئینانا حكومه‌تا نوو یا عیراقێدا، ل سه‌ر بنه‌مایێن به‌رنامه‌یه‌كێ روون و تێر و ته‌سه‌ل بوو، كو هه‌موو لایه‌ن ل سه‌ر رێككه‌ڤتبوون.

دابینكرنا به‌شه‌ك ژ شایسته‌یێن داراییێن هه‌رێما كوردستانێ كو مافه‌كێ ره‌وایێ خه‌لكێ كوردستانێ یه‌، به‌شه‌ك   ژ ئه‌وى به‌رنامه‌ی بوو یێ رێككه‌ڤتن ل سه‌ر هاتییه‌ كرن، له‌وما بریارا ئه‌ڤرۆ یا دادگه‌ها فیدرال، ژبه‌رى كو ب دژى هه‌رێما كوردستانێ بیت، دژى پرۆسه‌یا سیاسى و دژى حكومه‌تا عیراقێ و دژى به‌رنامه‌یێ هه‌ڤپه‌یمانییا ئیداره‌یا ده‌وله‌تێ ژییه‌.

جهێ حێبه‌تییێ یه‌ هه‌ر ده‌مێ سه‌قایه‌كێ ئیجابى دناڤبه‌را هه‌رێم و به‌غدا دا درووست ببیت و ده‌رفه‌ته‌ك بۆ چاره‌سه‌ركرنا ئاریشه‌یان په‌یدابووى، هه‌ر زوو دادگه‌ها فیدرالى كار بۆ تێكدانا ئه‌وێ ده‌رفه‌تێ كرییه‌ و ب بریاره‌كا دوژمنكارانه‌ ده‌رفه‌ت ژناڤبرییه‌ و بوویه‌ ئه‌گه‌رێ ئالوزتربوونا ئاریشه‌یان، دیاره‌ ئه‌جندایه‌كێ گوماناوى بجهدئینیت و جهێ دادگه‌ها شوره‌ش (محكمة الثورة) یا رژێما پێشتر گرتییه‌.

ل ڤێرێ داخوازێ ژ حكومه‌تا عیراقێ و لایه‌نێن پێكهێنه‌رێن هه‌ڤپه‌یمانییا ئیداره‌یا ده‌وله‌تێ دكه‌م، هه‌لویستێ خوه‌ به‌رامبه‌ر ئه‌وان پێشلكارى و دژایه‌تیكرنا نیشانبده‌ن كو ژلایێ دادگه‌ها فیدرالیڤه‌ ب دژى به‌رژه‌وه‌ندییێن عیراق و هه‌رێما كوردستانێ دهێته‌ كرن

مه‌سعوود بارزانى

25ى كانوونا دووێ یا 2023ێ