سه‌رۆكێ هه‌رێمێ پێشوازى ل كۆنسولا نوو یا بريتانيا ل هه‌ولێرێ كر

ئه‌ڤرۆ چارشه‌مبی سه‌رۆكێ هه‌رێما كوردستانێ پێشوازى ل ڕۆزى كه‌يڤ كونسولا گشتی یا بريتانيا ل‌ هه‌رێما كوردستانێ كر.

د ديداره‌كێ دا، نێچيرڤان بارزانى سه‌رۆكێ هه‌رێما كوردستانێ زێده‌باری ب ‌خێرهاتنێ و پيرۆزباهییێ بۆ ده‌ست بكاربوونا وێ، هيڤییا سه‌ركه‌فتنێ بۆ خانم كه‌يڤ خواست و هه‌موو پشته‌ڤانی بۆ سه‌رخستنا كار و ئه‌ركێن وێ ل هه‌رێما كوردستانێ دوپات كرییه‌، هه‌روه‌سا سوپاس و پێزانينێن هه‌رێما كوردستانێ بۆ هاریكارى و پشته‌ڤانییا بريتانيا د هه‌موو بیاڤان دا ده‌ربرى.

خانم كه‌يڤ زێده‌باری ده‌ربڕينا خۆشحالییێ ب‌ ده‌ست بكاربوونا وێ ل‌ هه‌رێما كوردستانێ، دوپات كر‌ كو دێ هه‌موو بزاڤێن خۆ ئێخیته‌ كار بۆ پێشخستنا زێده‌تر ب‌ په‌يوه‌ندی یێن وه‌لاتێ وێ ل گه‌ل هه‌رێما كوردستانێ د‌ هه‌موو بیاڤان دا و ئاماده‌يیا خۆ نيشان دا بۆ هه‌موو هاريكارى و هه‌ماهه‌نگييه‌كێ ل ‌گه‌ل لايه‌نێن‌ په‌يوه‌نديدار یێن هه‌رێما كوردستانێ.

هه‌ردو ئالییان ته‌كه‌ز ل‌ خواستا دو لايه‌نی بۆ پێشخستنا په‌يوه‌ندييان و به‌رده‌واميیا هاريكاريیا هه‌ڤپشك دناڤبه‌را هه‌رێما كوردستانێ و بريتانيا كرییه‌، هه‌روه‌سا ده‌رباره‌یی‌ ره‌وشا عێراقێ و هه‌رێما كوردستانێ و داوی پێشهاتێن ڤێ ده‌ڤه‌رێ ب ‌گشتى، بيروڕا لێك گۆهارتن.