ده‌زگه‌هێ خێرخوازى یێ بارزانى دروونكرنه‌كێدا ل دۆر هه‌وا به‌لاڤكرنا دوو ملیۆن لیترێن گازا سپى ل سه‌ر خێزانێن كێم ده‌رامه‌ت دووپاتكر، ئه‌وێن ب نووچه و داخویانى زێده‌گاڤى ل سه‌ر ڤێ هه‌وێ كرین، دێ روانه‌یى دادگه‌هێ هێنه‌كرن.
ده‌زگه‌هێ خێرخوازى یێ بارزانى د روونكرنا خوه‌دا راگه‌هاند، دگه‌ل هاتنا شه‌پۆله‌كا سه‌رما و به‌فر و بارانێ كو سه‌رانسه‌رى هه‌رێما كوردستانێ گرتییه، ده‌زگه‌هێ خێرخوازى یێ بارزانى وه‌كو ئه‌ركه‌كێ مرۆڤایه‌تى سالانه، ل 31-1-2023ێ هه‌وا به‌لاڤكر دوو ملیۆن لیترێن گازا سپى ل سه‌ر 20 هزار خێزانێن كێم ده‌رامه‌تێن باژێر و گوندێن كوردستانێدا راگه‌هاند، و ئه‌و ب پێدڤى دزانن ل ده‌ستپێكێ سوپاسییا ئێك ب ئێك یا وان كه‌س و كۆمپانییان بكه‌ن یێن پشته‌ڤانییه‌كا تمام یا ماددى بۆ بجهئینانا ڤى پرۆژه‌ى ل ده‌زگه‌هێ خێرخوازى یێ بارزانى كرى.
هه‌روه‌سا دیاركر، ئه‌و هه‌موو وان نووچه و داخویانییان ره‌تدكه‌ن كو بۆ ماوێ چه‌ند رۆژانه هنده‌ك لایه‌ن و میدیایێن نه به‌رپرس به‌لاڤدكه‌ن و ب نه‌درووست د هژمێرن، و بۆ ده‌رخستنا راستییان ئه‌و دلسۆز و هه‌ڤپشكێن خوه پشتراست دكه‌ن كو دێ هه‌موویان رووبروو دادگه‌هێ كه‌ن.
ئاماژه ب هندێ ژیدا، ده‌زگه‌هێ خێرخوازى یێ بارزانى خودان باوه‌رییا خه‌لكێ ب شه‌ره‌فێ كوردستانێ و رێكخراوێن مرۆڤایه‌تییێ یێن نێڤده‌وله‌تى و جیهانییه، له‌وما نووچه و داخویانییێن هه‌لاویستى و دوور ژ بها و بنه‌مایێن ئه‌خلاقییێن مرۆڤایه‌تى و كارێ میدیایى، پێگه‌هێ مه‌زن یێ ده‌زگه‌هى ل دلێ خه‌لكى و ناڤه‌ندێن مرۆڤایه‌تی یێن جیهانى كێم ناكه‌ت، و دێ ده‌زگه‌هێ خێرخوازى یێن بارزانى پتر پالده‌ت خزمه‌تا خه‌لكێ سه‌ربلندێ كوردستانێ و مرۆڤایه‌تییێ ب گشتى بكه‌ت، و سوزێ دده‌ن هاریكارییێ مرۆڤایه‌تى یێن ده‌زگه‌هێ خێرخوازى یێن بارزانى ب پشته‌ڤانییا مرۆڤ دوست و خێرخوازان دێ دبه‌رده‌وامبن، و وه‌كو هه‌ر جار خوه ب خزمه‌تكارێن خه‌لكێ كوردستانێ دزانن، و دێ زێده‌تر خزمه‌تا خه‌لكێ كوردستانێ و ئاواره‌یان كه‌ن.
