نێچیرڤان بارزانى ، حه‌فتێ سالیا دامه‌زراندنا ئێكه‌تیا قوتابیێن كوردستانێ پیروز دكه‌ت و په‌یامه‌كێ ئاراسته‌ى سكرتێر و ئه‌ندامێن مه‌كته‌با سكرتاریه‌ت و هه‌مى هه‌ڤالێن ئێكه‌تیا وان دكه‌ت.
سه‌رۆكێ هه‌رێما كوردستانێ حه‌فتێ سالیا دامه‌زراندنا ئێكه‌تیا قوتابیێن كوردستانێ پیروزكر و گوت، 70ێ سالیا دامه‌زراندنا ئێكه‌تیا قوتابیێن كوردستانێ ل هه‌مى ئه‌ندامێن رێكخراوا خه‌باتكه‌ر و قوتابێن كوردستانێ ب گشتى پیروزبیت، و داخوازكر ئه‌ڤ هه‌لكه‌فته ببیته هانده‌ره‌كێ بهێز ژبۆ گرنگیدانا زێده‌تر ب خه‌باتا رێكخراوێ ل پێناڤ ماف و داخوازیێن قوتابیێن كوردستانێ.
سه‌رۆكێ هه‌رێما كوردستانێ ئاماژه ب هندێ ژى كر، ئێكه‌تیا قوتابیێن كوردستانێ خودان دیروكوكا تژى سه‌روه‌ریه، قوتابخانه‌كا نه‌ته‌وه‌یى بو ژبۆ پێگه‌هاندنا چه‌ندین سه‌ركرده و تێگوشه‌رێن دیار یێن ملله‌تێ مه كو رۆله‌كێ گرنگ ل بزاڤا رزگاریخوازیدا دیتیه و چه‌ندین شه‌هدێن قاره‌مان كرینه قوربانى.
دیار ژى كریه، ئێكه‌تیا قوتابیان سه‌ررایى به‌رپرسیاره‌تییا رێكخراوێ ژبۆ به‌رگریكرن ل مافێن قوتابیان و پێشكه‌فتنا شیان زانینێ و گرنگیپێدان ب به‌هره‌یان كو دگه‌ل پێشكه‌فتنا بله‌ز یا ڤى سه‌رده‌مى د بوارێ زانست و خۆاندن و په‌روه‌ردێدا بیت، به‌رپرسیاره‌تیا پێگه‌هاندنا تاكێ هشیار و كادرێ دلسوز و كارمه‌نێ لێهاتى د ستۆیێ واندایه ژبۆ خزمه‌تا نه‌ته‌وه و جڤاكى، هه‌روه‌سا بۆ بهێزكرنا بنه‌مایێن لێبورین و ئێكرێزی و پێكڤه‌ژیان و پاراستنا پێكڤه‌ژیانێ و ئاشتیێ، بۆ ڤێ مه‌ره‌مێ هه‌مى ده‌مان دێ پشته‌ڤانێ هه‌وه بین.
