کۆڤان حسێن
كوردا ئەگەر بەرێ هەلسەنگاندن بۆ كەسەكێ تەمبەل و بكێرنەهاتی كربا، دابێژن (هێلیڤانكا) وی پیڤازە، پیڤاز خەریكە ل ئالییێ مە وەك (یۆرانیۆمێ مەیاندی) بیت كەس بمە نە فرۆشیت و پاشی ئەم ل كیڤەینە، ڤان رۆژا دیاربوو كوردستانێ (عەجز) یێ هەی ل دابینكرنا پیڤازا دا، سادەترین پرسیار ئەڤەیە، ئەگەر وەلاتییان بڕیاردا پیڤازا نە فرۆشن چارەیا مە چیە، ئەڤە ئاسانە هەر كەس (تەنزیرێ) و بێژیت سیچێن حكومەتێ یە ژ خۆ حكومەت هەمی گاڤا هێجەتەكا حازرە بۆ هەر كەرتەكێ كوردستانێ تێدا هەرسێ بینن تۆمەتبار دكەن. ئەرێ هێزا كاركەر و كەد كەرا كوردستانێ و شیانێن ڤەژاندنا بازاری كانێ، ژخۆ دبێژن پتریا وەلاتییێن كوردستانێ كچ و كور هێزەكا مەزنا شیانا كاری نە. ئەرێ كوردستانێ حكومەتەك گەندەل و فاشل و دز و هەمی رەنگی یا هەی وەك هندەك دبێژن و بۆ دچن و وەسا حكومەتێ ناسدکەن، پرسیار ئەڤە ئەرێ جڤاك و مللەت لكیڤە نە ل پرسا پیڤازا دا ل كیڤەنە؟ نەشخە و بەرنامێ مللەتی چیە بۆ دابینكرنا پیڤازا و نەخاسمە دەمێ وانە و مە هەمی رەگەزێن سەرەكی بۆ بەرهەمئینانا پیڤازەكا كوردی هەنە. راستە ل گەلەك جها پیڤاز یێ وەك (بتكوینی) گران دبیت لێ مسوگەر وەلاتییان تێرا خۆ هەنە یێن وەك كوردستانێ نەبن كو ماینە بێ پیڤاز. چ شانازیەك ل ڤی وەلاتی دبینن، پشتی سیهـ سالان تنێ تاكێ كورد بۆ (مستهلك) و هیچ بەرهەمەك نینە و ب هەمی رەنگا ژی گازندا دكەتن ژ بەخت رەشیا خۆ.
بەری چەند سالان ل تركیا قەیرانا پیڤازا درستبوو بەلێ هەر زی جۆتیارێن توركیا بازار تژی پیڤاز كر و قەبارێ سەرمایا پیڤازا بوو چەند قات و فرێكرن ژ دەرڤە ژی, ئەرێ ئەم ئەڤ مللەتە نەشێن بتنێ پیڤازا دابین كەین ؟ ئەرێ ئەم چ بەرسڤا ئاسویێن ئایندەی دەین ئەگەر پرسیار ژ مە كرن. پاشی دنیایە و نەدیرە هەمی گاڤا شەرێ جیهانی درست بیت رێك و دەراڤ بێنە گرتن وەك دبێژن ئەرێ ئەم وەلاتییێن كوردستانێ دێ چ خۆین بلا مە پارە و بودجە ژی هەبن. ئەگەر وەلاتی تشتێ خۆ نەفرۆشیتە مە. ئەم خودانێن چنە، خۆ پیڤازەك ژی د هێلیڤانكا مەدا نینە، ب پری بەریكێن مە دۆلار بن….
