نێچیرڤان بارزانى : دێ ل ده‌مێ خوه‌ یێ قانوونى رۆژا هه‌لبژارتنان دیاركه‌م

نێچیرڤان بارزانى سه‌رۆكێ حكومه‌تا هه‌رێما كوردستانێ و ئه‌نتۆنیۆ گۆتیرێس سكرتێرێ گشتییێ نه‌ته‌وه‌یێن ئێكگرتى كۆمبوون.

ل دووڤ راگه‌هاندنا سه‌رۆكایه‌تییا هه‌رێما كوردستانێ هه‌ردوولایان دووماهى پێشهاتێن ره‌وشا سیاسییا عیراق و هه‌رێما كوردستانێ، په‌یوه‌ندییێن هه‌ولێر و به‌غدا، پێنگاڤ و دانوستاندنێن دناڤبه‌را واندا بۆ چاره‌سه‌ركرنا ئاریشه‌یان، كارنامه‌یا حكومه‌تا فیدرالییا عیراقێ و ره‌وشا شنگالێ گوتوبێژكرن.

د ته‌وه‌ره‌كێ دیدا به‌حس ل هه‌لبژارتنێن هه‌رێما كوردستانێ هاته‌كرن، دڤى بیاڤیدا نێچیرڤان بارزانى دووپاتكر، ئه‌و وه‌ك سه‌رۆكێ هه‌رێما كوردستانێ دێ ل ده‌مێ خوه‌ یێ قانوونى رۆژا هه‌لبژارتنان دیاركه‌ت و دڤێت د ئه‌ڤساله‌دا هه‌لبژارتن بهێنه‌ كرن.

ژلایێ خۆڤه‌ سكرتێرێ گشتییێ نه‌ته‌وه‌یێن ئێكگرتى خۆشحالییا خوه‌ ب پێنگاڤێن دانوستاندنان دناڤبه‌را هه‌ولێر و به‌غدا دا نیشاندا، و پشته‌ڤانییا نه‌ته‌وه‌یێن ئێكگرتى بۆ چاره‌سه‌ركرنا ئاریشه‌یێن دناڤبه‌را واندا دووپاتكر.

هه‌ردوولا ل سه‌ر پێدڤى و گرنگرییا بجهئینانا رێككه‌ڤتنا حكومه‌تا فیدرالى و حكومه‌تا هه‌رێما كوردستانێ بۆ ئاساییكرنا ره‌وشا شنگالێ، داكو ببیته‌ پالده‌ر و رێخۆشكه‌ر بۆ ڤه‌گه‌ریانا ئاوه‌رێن ئێزیدى بۆ ده‌ڤه‌رێن وان د هه‌ڤرابوون.

ده‌رباره‌ى ره‌وشا ناڤخۆ یا هه‌رێما كوردستانێژى، سكرتێرێ گشتییێ نه‌ته‌وه‌یێن ئێكگرتى دووپاتكر، چاره‌سه‌ركرنا ئاریشه‌یێن ناڤخۆ و ئێك رێزییا لایه‌نێن سیاسى، دێ پێگه‌هێ هه‌رێما كوردستانێ ل سه‌ر ئاستێ عیراق و ده‌رڤه‌ژى ب هێزكه‌ت.