بارسێلۆنا ب گه‌نده‌لییا وه‌رزشى هاته‌ تۆمه‌تباركرن

نڤێسینگه‌ها داواكارێ گشتییێ ئسپانیا یانه‌یا بارسێلۆنا ئیدانه‌كر و ب گه‌نده‌لییا وه‌رزشى تۆمه‌تباركر، پشتى ب تومه‌تا پاره‌دانێ ب جێگرێ لژنه‌یا دادڤانان یێ به‌رى نوكه‌ خوسێ ماریا ئینریكێز نیگرێراى هاتییه‌ تۆمه‌تباركرن.

ل دووڤ رۆژنامه‌یا ماركا یا ئسپانى، هاتییه‌ دووپاتكرن كو به‌رشه‌لۆنا و سه‌رۆكێ وێ یێ به‌رێ جوزێپ ماریا بارتومیۆ ژ ڤێ تاوانێ به‌رپرسن، هه‌روه‌سا گه‌له‌ك سه‌رۆكێن دى یێن یانه‌یێ وه‌كو خوان گاسپارت، خوان لاپۆرتا و ساندرۆ رۆسێل ژى دڤێ تومه‌تێدا د پشكدارن، كو ئه‌وان ژى به‌رى نوكه‌ ل ده‌مێ سه‌رۆكایه‌تییا خوه‌ پاره‌ داینه‌ جێگرێ سه‌رۆكێ لژنه‌یا دادڤانان.

رۆژنامه‌یێ ئاشكراكر، ئۆفیسا داواكارێ گشتى یانه‌یا بارسێلۆنا ب گه‌نده‌لییێ تۆمه‌تباركر، و ئه‌و سكالایا ل سه‌ر هاتییه‌ تۆماركرن ره‌وانه‌ى دادگه‌ها بارسێلۆنا هاتییه‌ كرن، پشتى پۆلیسان لێكۆلین كرى و هه‌موو به‌لگه‌یێن پێدڤى یێن ژ سالا 2011ێ هه‌تا 2018ێ بده‌ستخستین، كو ل سالا 2018ێ بارتومیوى ئه‌و كاره‌ دگه‌ل جێگرێ سه‌رۆكێ لژنه‌یا دادڤانان راوه‌ستاندبوو.