سهرۆكێ ههرێما كوردستانێ و سهرۆكێ جڤاتا بلندا دادوهرییا عیراقێ ل ههولێرێ كۆمبوون، و گرنگییا رۆلێ دادوهر و دادگههان ل سهر سهقامگێرى و كاریگهرییا وان ل سهر ههموو بوارێن ژیانێ دانا بهر گوتوبێژان.
سایتێ سهرۆكایهتییا ههرێما كوردستانێ راگههاندنهك بهلاڤكر و تێدا هاتییه، نێچیرڤان بارزانى سهرۆكێ ههرێما كوردستانێ، پێشوازى ل فائق زێدان سهرۆكێ جڤاتا بلندا دادوهرییا عیراقێ كر، و د دیدارهكێدا گرنگییا رۆلێ دادوهر و دادگههان ل سهر سهقامگێرییا وهلاتى و كاریگهرییێن وێ ل سهر ههموو بوارێن ژیانێ گوتوبێژكر.
ههروهسا ل سهر گرنگرییا بجهئینانا پرۆگرامێ كابینهیا حكومهتا فیدرال دههڤرابوون كو رێككهڤتنا ههموو لایهن و پێكهاتهیان ل سهره.
ژلایێ خۆڤه نێچیرڤان بارزانى سوپاسییا سهرۆكێ جڤاتا دادوهرى كر، بۆ رۆل و ئهركێن وى ل كارێ پێكڤه و دووپاتكر، كو دڤێت دادگههـ جهێ پشتراستییێ بن بۆ ههموو وهلاتى و پێكهاتهیێن عیراقێ.
دبهرامبهردا سهرۆكێ جڤاتا بلندا دادوهرى، سوپاسییا رۆل و پێگههێ نێچیرڤان بارزانى بۆ پێكڤهژیانێ و پێكڤهییێ ل سهر ئاستێ عیراقێ ب گشتى.
