وەزیرێ دارایی: هوون سلێمانییێ سزا دده‌ن، نه‌كو ئه‌ز

ئاوات شێخ جه‌ناب وه‌زیرێ دارایى و ئابوورى ل دۆر داخویانییه‌كا شاناز ئیبراهیم ئه‌حمه‌د كو به‌حسا سزادانا سلێمانییێ دكه‌ت، دبێژیت: گه‌نده‌لى و خه‌ندقاندنا بازارى و ستاندنا وى ژ بازرگانان بكه‌ره‌ك هه‌یه‌ و كاره‌كته‌رێن وێ ل سلێمانییێ و ده‌وروبه‌رێ وێ ناهێنه‌ ڤه‌شارتن.

ل دووڤ راگه‌هاندنه‌كا وه‌زاره‌تا دارایى و ئابوورییا حكومه‌تا هه‌رێما كوردستانێ، وه‌زیرێ دارایى ب چه‌ند روونكرنان به‌رسڤا داخویانییه‌كا شاناز ئیبراهیم ئه‌حمه‌د دده‌ت، كو به‌حسا سزادانا سلێمانییێ ژلایێ وه‌زیرێ دارایى و ئابووریڤه‌ دكه‌ت.

ده‌قێ به‌رسڤا وه‌زیرێ دارایى:

ئێك: ئاریشه‌ێن سلێمانییێ و ده‌وروبه‌رێن وێ یێن ئه‌ڤێ كابینه‌یێ و ئه‌ڤێ وه‌زاره‌تا دارایى نینن، ئه‌گه‌رێن وان هه‌ر ئه‌و ئه‌گه‌رن یێن كو به‌رى ڤێ مێژوویێ سلێمانى و ده‌وروبه‌رێن وێن وێرانكرین و نوكه‌شى د به‌رده‌وامن، جه‌نابێ هه‌وه‌ نه‌شێت خوه‌ ژێ بێ ئاگه‌هـ بكه‌ت، و نه‌شێت سلێمانییا 2019ێ ژ یا نوكه‌ جوانتر و پێشكه‌ڤتیتر ببینیت.

دوو : گه‌نده‌لى و خه‌ندقاندنا بازارى و ژێ ستاندنا وى ژ بازرگانان و … هتد بكه‌ره‌كه‌ و كاره‌كته‌رێن وێ ل سلێمانییێ و ده‌ورووبه‌رێن وێ ژ كه‌سێ ناهێنه‌ ڤه‌شارتن و نه‌شێن خوه‌ ژێ بێ گونه‌هـ بكه‌ن، ئانكو هوون ب خۆ سلێمانییێ سزا دده‌ن نه‌كو به‌ند.

سێ : ماوێ نێزیكى چار سالانه‌ ئه‌م ل وه‌زاره‌تا دارایى دبزاڤێن به‌رده‌وام داینه‌ بۆ چاره‌سه‌ركرنا ئاریشه‌یێن سلێمانییێ و ئه‌وا دشیانێن مه‌ دا هه‌یى مه‌ یا بۆ كرى، و چه‌ند شیاینه‌ یێن ل سه‌ر ئاسته‌نگێن وه‌ یێن ده‌ستكر سه‌ركه‌ڤتین، و ئه‌ڤه‌ ب كریاره‌ نه‌كو ب ئاخڤتنێن بێ مانا و فشه‌یا سیاسی‌، بۆ راستییێ ژى هوون دشێن پرسیارێ ژ وه‌زیرێن خوه‌ و پارێزگارێن سلێمانی و هه‌له‌بجه‌ و ئیداره‌یێن سه‌ربه‌خۆ یێن گه‌رمیان و راپه‌رین بكه‌ن.

چار : ئاریشه‌یا نوكه‌ یا سلێمانییێ سه‌ربارى داكه‌ڤتنا داهاتێ سنۆرێ وێ، ژ سالا 2021ێ ده‌ستپێدكه‌ت، ده‌مێ ل 1-1-2021ێ ل بانكێن سلێمانییێ نێزیكى ( 350 ) ملیار دیناران وه‌فر هه‌بوو، ل دووماهییا هه‌مان سال گه‌هشته‌ نێزیكى 100 ملیار دیناران، ل دووماهییا سالا 2022ێ كورتئینان ل بانكێن سلێمانییێ گه‌هشته‌ نێزیكى ئێك تریلیۆن دیناران، كو هه‌موو پاره‌یێ وه‌لاتى و فه‌رمانگه‌هێن سلێمانییێ بوو.

ل وى ده‌مێ مه‌ بكه‌رێ سه‌ره‌كى یێ وێ تالانێ‌ سزاداى، جه‌نابێ هه‌وه‌ گۆله‌بارانكر، مه‌ راده‌ستى دادگه‌هێ كر و جه‌نابێ هه‌وه‌ پاداشتكر، ئه‌ڤجا ده‌مێ هه‌وه‌ پاداشتكرى سلێمانى هاتییه‌ سزادان، یان ژى ده‌مێ مه‌ دایه‌ دادگه‌هێ ؟

پێنج: رێككه‌ڤتنا ل سه‌ر پشكا 57 و پشكا 43ێ وه‌زاره‌تا دارایى ژێ به‌رپرس نینه‌ و گه‌له‌ك ب دژى وێیه‌، یا پێدڤى بوو جه‌نابێ هه‌وه‌ ژ ده‌ستپێكێ قه‌بوولنه‌كربا، نه‌كو ل ڤێ دووماهییێ ل بیرا هه‌وه‌ بهێت، ئه‌گه‌رێ ده‌ركه‌ڤتنا وى كارى هه‌ر ل ستۆیێ هه‌وه‌یه‌ ژبه‌ركو پێ رازیبوون.

شه‌ش : ئه‌ز ئێك ژ وان پێشمه‌رگان بووم كو گه‌نجینییا خوه‌ و خوین و زه‌حمه‌ته‌كا زێده‌ بۆ كوردستان و سلێمانییێ مه‌زاختینه‌، گه‌له‌ك و گه‌له‌ك ژ هه‌وه‌ پتر حه‌ز ژێ دكه‌م و دلێ من پێ دسۆژیت، هه‌رده‌م حه‌زژێكرنا وى باژێرى و خه‌لكێ وێ د دل و ده‌روومێ مندایه‌، نه‌كو د هه‌لكه‌ڤتاندا هزرا وێ دكه‌م و ئه‌ز نه‌هاتیمه‌ سه‌ر حازرى.