عه‌بدولسه‌لام به‌رواری: لێك تێگه‌هشتنه‌كا باش دناڤبه‌را پارتی و ئێكه‌تییێ دا هه‌یه‌

ئاژانسا خانی ” تایبه‌ت:

عه‌بدولسه‌لام به‌رواری” ئه‌ندامێ شاندێ پارتی بۆ گوتۆبێژێن هه‌مواركرنا یاسایێ هه‌لبژارتنێن په‌رله‌مانێ كوردستانێ” بۆ ئاژانسا خانی دیار كر:  هەردو شاندێن پارتی و ئیكه‌تییێ ژ ئالییێ تیۆریڤه‌ ل سەر هەموو بابه‌تێن تایبه‌ت ب هەڵبژارتنانڤه‌ گەهشتینە لێك تێگه‌هشتنه‌كا باش و ب تنێ بابه‌تێ پێکهاتان مایە، وه‌سا بریاره‌ پێكهاته‌ ب خوه‌ بریارێ ل سه‌ر ڤی بابه‌تی بده‌ن و سوبه‌هی ئێكشه‌مبی نێچیرڤان بارزانی سه‌رۆكێ هه‌ڕیما كوردستانێ دێ ل گه‌ل پێكهاتان كۆم بیت” د هه‌مان ده‌مدا مه‌ وه‌كو پارتی بریار دایه‌” ئه‌م حه‌ز ناكه‌ین كه‌س بریارێ لسه‌ر پێكهاتان بده‌ت.

عەبدولسەلام بەرواری زێده‌تر ئاشكرا كر: ” ئه‌ڤرۆ شه‌مبییێ پشكا هەلبژارتنێن پارتی و دەزگه‌هێ هەڵبژارتنێن ئێكه‌تییێ دێ ل گەڵ دەزگه‌هێن هەڵبژارتنێن ئالی یێن دیتر یێن كوردستانێ كۆم بن، ب مه‌ره‌ما دیار كرنا وێ لێك تێگه‌هشتنا دناڤبه‌را پارتی و ئێكه‌تییێ دا هه‌یی، چونکی ئه‌و ئالی ژی پشكدار بوون دناڤا وی پرۆژه‌یێ ئیكه‌تییێ و وان چار ئالی یێن دیتر پیشكیش كری.

ناڤهاتی گۆت ژی: ل سه‌ر بابه‌تێ هه‌مواركرنا یاسایێ هه‌لبژارتنێن په‌رله‌مانی كوردستانێ پارتی دیموكراتی كوردستان و ئێكه‌تی نیشتیمانی كوردستان لێك تێگه‌هشتنه‌كا باش هه‌یه‌ و ب تنێ رێككه‌فتن مایه‌ بهێته‌ كرن، هه‌روه‌سا د كۆمبوونا ئێكێ دا بابه‌تێ سیسته‌مێ هه‌لبژارتنان ئێكلابوویه‌ و ب تنێ یێ پێكهاتێن هه‌رێمێ مایه‌ ، ئەم ل سه‌ر هندێ رێككه‌فتینه‌ پێكهاتان چ بڤێت ئه‌م دێ ب هندێ رازی بین، سوبه‌هی ئیكشه‌مبی سه‌رۆكێ هه‌رێمێ دێ ل گه‌ل پێكهاتان كۆم بیت و ئه‌و دخوازن ئێك بازنێ هه‌لبژارتنان بۆ پێكهاتان ل كوردستانێ هه‌بیت و هه‌كه‌ رێككه‌فتن ل سه‌ر بابه‌تێ هه‌لبژارتنا هاته‌ كرن” ل ڤێ حه‌فتییێ بریاره‌ خواندنا ئێكێ بۆ یاسایێ هه‌لبژارتنێن په‌رله‌مانێ كوردستانی بهێته‌ كرن و دیسان كۆمسیۆنا هه‌لبژارتنان ژی ل هه‌رێما كوردستانێ بهێته‌ كارا كرن.