سەرۆك بارزانی ل گەڵ میری ئێزیدیان و بابا شێخ و جڤاتا ڕۆحانییا ئێزیدی كۆمبوو
ئەڤرۆ ڕۆژا شەمبی 11ی ئادارا 2023 ل سەلاحەددین سەرۆك مەسعود بارزانی ل گەڵ میر حازم تەحسین بەگ میرێ ئێزیدیان و شێخ عەلی ئەلیاس بابا شێخ و جڤاتا ڕۆحانییا ئێزیدیان كۆمبوو.
د كۆمبوونێدا میرێ ئێزیدیان كورتەیەك ژ ئەنجامێ سەردانا خوە بۆ دەرڤەی وەڵاتی بۆ سەرۆك بارزانی باس كر و پێزانینێن خوە ژی بۆ قوربانیدانا هێزێن پێشمەرگەیێن كوردستانێ و پارتییا دیموكراتا كوردستانێ بۆ ئازادكرنا شنگالێ و پاراستن و پشتەڤانیكرنا كوردێن ئێزیدی و پێكهاتەیێن دی دەربڕی.
بارەگایێ بارزانی گۆتییە ژی، هەر د كۆمبوونێدا جەخت ل وێ یەكێ هاتە كرن كو پێدڤییە ب زووترین دەم ڕێككەڤتنناما شنگالێ بهێتە بجهئینان و ڕێگرییێن پێش ڤەگەریانا ئاواران بۆ زێدێ باب و باپیرێن وان نەمینن.
هەر ل دۆر بابەتێ شنگالێ سەرۆك بارزانی گۆتییە: ب هەمی شێوەیەكی پشتەڤانییا بجهئینانا رێككەڤتنا شنگالێ دكەت و ب پێدڤی ژی دزانیت ئەو هێزێن دەرڤەی یاسایێ شنگالێ بجهـ بهێڵن و رەوشا شنگالێ ئاسایی بكەن و شنگالێ بدەنەڤە دەستێ خەلكێ رەسەنێ شنگالێ.
سەرۆك بارزانی ئامادەبوویێن كۆمبوونێ پشت راستكر كو ب هیچ شێوەیەكی رێك ناهێـتە دان خوشك و برایێن ئێزدی تووشی دلتەنگییێ و پشتگوھـ هاڤێتنێ ببن.
