سه‌رۆكێ هه‌رێما كوردستانێ دگه‌ل شانده‌كێ ئه‌مریكا كۆمبوو، و هه‌ردوو لا دهه‌ڤرابوون كو چاره‌سه‌ركرنا ئاریشه‌یێن هه‌ولێر و به‌غدا دێ بۆ سه‌قامگێرییا سیاسى و ئابوورى ل عیراق و هه‌رێما كوردستانێ یا هاریكار بیت، و ل دۆر ئاریشه‌یێن دناڤبه‌را لایه‌نێن سیاسى و ب تایبه‌تى پارتى و ئێكه‌تییێدا، دووپاتى ل ئێكرێزییا دناڤبه‌را واندا كر.
ل په‌راوێزا حه‌فته‌مین دیدارا سلێمانییێ، نێچیرڤان بارزانى سه‌رۆكێ هه‌رێما كوردستانێ پێشوازى ل شانده‌كێ ئه‌مریكا ب سه‌رۆكایه‌تییا تێرى وولڤ هاریكارێ تایبه‌تێ سه‌رۆكێ ئه‌مریكا و رێڤه‌به‌رێ بلند یێ رۆژلاهه‌تا ناڤین و باكوورێ ئه‌فریكا ل جڤاتا ئاسایشا نیشتیمانی كر.
سه‌رۆكایه‌تییا هه‌رێما كوردستاتێ دراگه‌هاندنه‌كێدا ل دۆر كۆمبوونێ دیاركر، به‌حسا ره‌وشا سیاسى و ئابوورییا عیراق و هه‌رێما كوردستانێ هاته كرن، و هزر و بیر ل دۆر په‌یوه‌ندییێن هه‌ولێر و به‌غدا و ئاریشه‌یێن دناڤبه‌را واندا هاتنه لێكگۆهارتن.
شاندێ ئه‌مریكا به‌رده‌وامییا پشته‌ڤانی و هاریكارییا وه‌لاتێ خوه بۆ عیراق و هه‌رێما كوردستانێ دووپاتكر، و ل دۆر ره‌وشا ناڤخۆ یا هه‌رێما كوردستانێ ژى ئه‌و شانده وه‌سا دبینیت، ئێكرێزییا هێزێن سیاسییێن كوردستانێ ب تایبه‌تى پارتى و ئێكه‌تییێ بۆ ده‌ربازكرنا ئاسته‌نگێن نوكه یێن عیراق و هه‌رێما كوردستانێ یا گرنگ و پێدڤییه.
دپشكه‌كا دییا كۆمبوونێدا هه‌ردوو لا دهه‌ڤرابوون، كو چاره‌سه‌ركرنا ئاریشه‌یێن هه‌ولێر و به‌غدا دێ بۆ سه‌قامگێرییا سیاسى و ئابوورییا عیراق و هه‌رێما كوردستانێ یا گرنگ بیت، هه‌روه‌سا دووپاتى ل پشته‌ڤانیكرنا محه‌مه‌د شیاع سوودانى سه‌رۆكوه‌زیرێن عیراقێ هاته كرن.
