سه‌رۆك بارزانى هنده‌ك نهێنیێن به‌رى شه‌ڕێ عیراقێ ئاشكراكرن

سه‌رۆك بارزانى د دیداره‌كێدا دگه‌ل رۆژنامه‌ڤانێ ناڤدار غه‌سان شربل سه‌رنڤیسه‌رێ رۆژنامه‌یا شه‌رق ئه‌لئه‌وسه‌ت، به‌حسا رۆژێن ژناڤبرنا رژێما سه‌دام حسێنى و شاشییا ئه‌مریكا دڤى بیاڤیدا كر، و ئه‌و ترسه‌ ژى ئاشكراكر یا كو پشتى ژناڤبرنا رژێما سه‌دام حسێنى ل ده‌ڤ ئیرانى و سوورییان په‌یدابووى.

ئه‌ڤه‌ژى ده‌قێ دیدارێیه‌ :

شه‌رق ئه‌لئه‌وسه‌ت : كه‌نگى هوون هاتنه‌ ئاگه‌هداركرن كو ئه‌مریكا به‌رهه‌ڤییان بۆ ژناڤبرنا رژێما سه‌دام حسێنى دكه‌ت ؟

سه‌رۆك بارزانى : ل نیسانا 2002ێ شانده‌كى ژ واشنتۆنێ ب فه‌رمى داخوازا به‌رهه‌ڤبوونێ ژ من و وه‌غه‌ركرى مام جه‌لالى ل واشنتۆنێ كربوو، ئه‌م ئاگه‌هداركرین كو پێشكه‌ڤتنه‌كا گه‌له‌كا مه‌زن دسیاسه‌تا ئه‌مریكادا هاتییه‌، و ل پاشه‌رۆژێ تشتێن گه‌له‌ك مه‌ترسیدار دێ رووده‌ن، لێ هه‌موو هووركارى بۆ مه‌ نه‌گوتن، مه‌ سه‌ره‌دان كر، لێ سه‌ره‌دانه‌كا نه‌ راگه‌هاندى بوو، سێ هه‌تا چار رۆژان ماین، ئه‌م ب فه‌رمى ئاگه‌هداركرین كو بریار هاتییه‌ دان و رژێم دێ ب رێكا هێزا له‌شكه‌رى هێته‌ گوهۆرین.

شه‌رق ئه‌لئه‌وسه‌ت : كى د كۆمبوونێدا یێ به‌رهه‌ڤبوو ؟

سه‌رۆك بارزانى : نوونه‌رێ وه‌زاره‌تا ده‌رڤه‌ یا ئه‌مریكا و به‌رپرسێ كه‌یسا رۆژهه‌لاتا ناڤه‌راست بوون، جێگرێ رێڤه‌به‌رێ CIA و یا ژ منڤه‌ پێنتاگونژى بوو، شانده‌كێ تێكه‌ل بوو، گوته‌ مه‌: بریار هاتییه‌ دان و مه‌ دڤێت بوچوونا وه‌ وه‌ربگرین، مه‌ گوت : هوون بۆ ژناڤبرنا رژێمێ رژدن، لێ پرسیارا گرنگتر ئه‌وه‌ كو پشتى ژ ناڤبرنا رژێمێ دێ چه‌وا بیت؟ وان گوت: بۆ ڤى بابه‌تى ئه‌م پێدڤى ب هاریكارییا هه‌وه‌ینه‌، هوون چ شیره‌ت ل مه‌ دكه‌ن، د راستیدا ئه‌م ئاخڤتین، من و وه‌غه‌ركرى مام جه‌لالى و ئه‌و شاندێ دگه‌ل مه‌ تێبینییا هندێ كر كو ئه‌م د رازى بین یان نه‌  و پشكدارییێ بكه‌ین یانژى نه‌، ئه‌و دێ هه‌ر رژێمێ ژناڤبه‌ن، وان گوت: مه‌ پێدڤى سیهوانه‌یه‌كا سیاسییه‌ كو دێ ل ده‌مێ سازكرنا پرێسكۆنفرانسه‌كى بۆ ئۆپۆزسیۆنا عیراقێ ب هه‌موو گرۆپێن وێڤه‌ بێى جووداهى درووست بیت، دڤێت دوى كۆنفرانسیدا هوون بریارێ بده‌ن كا پشتى ژناڤبرنا رژێمێ دێ چ كه‌ن و گوت: ئه‌ڤه‌ هزره‌كا باشه‌ و مه‌ دگه‌ل هێزێن دیژى كار كرییه‌، ل هه‌یڤا 12 یا سالا 2002ێ ئه‌م دگه‌ل گرۆپێن دى ئاخڤتین، به‌هرا پتر یا وان د رازیبوون و پشكه‌ك یا رازى نه‌بوو.

شه‌رق ئه‌لئه‌وسه‌ت: پشتى هوون ژ ئه‌مریكا ڤه‌گه‌ریاین، ژ هێزێن هه‌رێمى هه‌وه‌ كى ل سه‌ر ناڤه‌رۆكا كۆمبوونێ ئاگه‌هدار كر؟

سه‌رۆك بارزانى : ئه‌ز دبێژم ل ده‌مێ ڤه‌گه‌ریانێ من سه‌ره‌دانا دیمه‌شقێ كر و چاڤێ من ب سه‌رۆك به‌شار ئه‌سه‌دى كه‌ڤت، من گوتێ كو بریار هاتییه‌ دان و رژێم دێ ژناڤچیت، ئه‌وى گومان هه‌بوو و باوه‌ر نه‌دكر، ئه‌سه‌د رازى نه‌بوو، لێ گوت هوون به‌رژه‌وه‌ندییا خوه‌ ژ یا مه‌ باشتر دزانن.

شه‌رق ئه‌لئه‌وسه‌ت : ئه‌رێ ئیران رازى بوو كو ئه‌مریكا رژێما سه‌دامى ژناڤببه‌ت؟

سه‌رۆك بارزانى : به‌لێ، ئه‌وان هێز و لایه‌نێن نێزیكى خوه‌ پالدان.

شه‌رق ئه‌لئه‌وسه‌ت : ل ته‌هرانێ ته‌ كى دیت ؟

سه‌رۆك بارزانى : چاڤێ من ب شه‌هید محه‌مه‌د باقر ئه‌لحه‌كیم كه‌ڤت، من داخواز ژێ كر شیره‌تان ل جڤاتا بلند بكه‌ت داكو زێده‌تر د واقعى بن، چاڤێ من ب ره‌فسنجانى كه‌ڤت كو ل وى ده‌مى سه‌رۆككۆمار بوو، چاڤێ من ب قاسم سوله‌یمانى كه‌ڤت، وى ئاخڤتن ل سه‌ر بابه‌تى نه‌بوو ل وى ده‌مى كه‌سایه‌تییه‌كێ دیار نه‌بوو و كه‌یسا عیراقێ د ده‌ستێن ویدا نه‌بوو.

شه‌رق ئه‌لئه‌وسه‌ت : قاسم سوله‌یمانى پشته‌ڤانێ هندێ بوو كو ئه‌مریكا بهێته‌ عیراقێ ؟

سه‌رۆك بارزانى : به‌لێ، ره‌فسنجانى گوت: ئه‌م نه‌شێین ب ئاشكرایى پشته‌ڤانییا ڤێ چه‌ندێ بكه‌ین، لێ ژناڤبرنا سه‌دامى بۆ مه‌ تشته‌كێ مه‌زنه‌ و سه‌ركه‌ڤتنه‌كا مه‌زنه‌.

شه‌رق ئه‌لئه‌وسه‌ت : ئه‌رێ توركیا ؟

سه‌رۆك بارزانى : توركیا ب وى مه‌رجى پشته‌ڤان بوو، رێك پێ بهێته‌دان دوو فرقه‌یێن له‌شكه‌رێ توركیا بهێنه‌ دناڤدا، فرقه‌یه‌ك بچیته‌ مووسل و یا دیژى بچیته‌ كه‌ركووكێ.

شه‌رق ئه‌لئه‌وسه‌ت : دپرێسكۆنفرانسێ له‌نده‌ندا ل سه‌ر سیسته‌مێ فیدرالى رێككه‌ڤت ؟

سه‌رۆك بارزانى: ل سه‌ر ناسنامه‌یا عیراقێ وه‌كو ده‌وله‌ته‌كا فیدرالییا دیموكراسییا به‌رفره‌هـ رێككه‌ڤتین.

شه‌رق ئه‌لئه‌وسه‌ت : ئه‌و رۆژا رژێما سه‌دام حسێنى ژ ناڤچووى و سه‌رۆك هاتییه‌ لادان، ته‌ هه‌ست ب چ كر؟

ولا ئایه‌ته‌ك هاته‌ بیرا من كو دبێژیت : ( اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاءُ وَتَنزِعُ الْمُلْكَ مِمَّن تَشَاءُ وَتُعِزُّ مَن تَشَاءُ وَتُذِلُّ مَن تَشَاءُ – ال عمران – الایە ٢٦) هاته‌ بیرا من ده‌مێ شوره‌شا ته‌موزێ ل سالا 1958ێ روودای‌ كو ل وى ده‌مى یێ بچووك بووم، ئه‌م چووینه‌ كوچكا ( ئه‌لرحاب ) سه‌ركه‌ڤتینه ‌سه‌ر بانێ كۆچكێ، من رسته‌یه‌ك خواند كو ل سه‌ر تانكێ ئاڤێ نڤیسیبوو، كه‌سه‌كى ل سه‌ر نڤیسیبوو، كوفر دێ به‌رده‌وامبیت، زۆلم یا به‌رده‌وام نابیت، ئه‌و رسته‌یه‌ هه‌تا نوكه‌ژى ل بیرا من مایه‌.

شه‌رق ئه‌لئه‌وسه‌ت : ل سالا 1958 تو چوویه‌ كوچكا ( ئه‌لرحاب ) ؟

سه‌رۆك بارزانى: به‌لێ پشتى شۆره‌شێ بوو.

شه‌رق ئه‌لئه‌وسه‌ت : پشتى وێ كۆمه‌لكوژییێ بوو ؟

سه‌رۆك بارزانى : به‌لێ پشتى كۆمه‌لكوژییێ بوو.

شه‌رق ئه‌لئه‌وسه‌ت : بۆ رۆژا پشتى ژناڤبرنا رژێمێ دگه‌ل ئه‌مریكا ل سه‌ر چ رێككه‌ڤتن؟

سه‌رۆك بارزانى : كۆنفرانسێ له‌نده‌ن ب رێككه‌ڤتن بوو، هاتنا حكومه‌تا مه‌ده‌نییا ( گارنه‌ر )ى بۆ هاریكاریكرنا ئۆپۆزسیۆنێ بوو ب مه‌ره‌ما پێكئینانا حكومه‌ته‌كا ده‌مكى، لێ پاش برێمه‌ر ب بریاره‌كا جڤاتا ئاسایشێ هات، ژماره‌یا بریارا جڤاتا ئاسایشێ ل بیرا من نینه‌، لێ ژ ئازادكرنێ بۆ داگیركرنێ هاته‌ گوهۆرین، ئه‌ڤێ ژى هه‌موو تشت گوهۆرین.

شه‌رق ئه‌لئه‌وسه‌ت : دیارترین شاشییا ئه‌مریكا د بابه‌تێ هاتنا خوه‌دا بۆ عیراقێ چ بوو ؟

سه‌رۆك بارزانى : مه‌زنترین شاشى ئه‌وبوو خوه‌ بۆ داگیركه‌رییێ گوهۆرى.

شه‌رق ئه‌لئه‌وسه‌ت: پشتى دوو ده‌یان، ئه‌رێ ته‌ چ شرۆڤه‌كرن بۆ بریارا پۆل برێمه‌رى ل سه‌ر هه‌لوه‌شاندنا له‌شكه‌رێ عیراقێ هه‌یه ‌؟

سه‌رۆك بارزانى : وه‌كو بریارا سێداره‌دانێ بۆ كه‌سه‌كێ مرى بوو، له‌شكه‌ر ب كریار هه‌لوه‌شییابوو، له‌شكه‌ر نه‌مابوو، پشتى هه‌لوه‌شاندنا رژێمێ ل رۆژا نه‌هێ نیسانێ، له‌شكه‌ر نه‌ما، نه‌ سه‌ربازگه‌هـ و نه‌سه‌ركردایه‌تى و نه‌ پله‌مه‌ندى مان، هه‌موو پێكهاته‌ نه‌مان، له‌شكه‌ر ب تمامى هه‌لوه‌شییا، له‌وما ئه‌و بریاره‌ وه‌كو هندێ بوو تۆ بریارا سێداره‌دانێ بۆ كه‌سه‌كێ مرى ده‌ربكه‌ن.

شه‌رق ئه‌لئه‌وسه‌ت : كێ هه‌بوونا له‌شكه‌رییا ئه‌مریكا تووشى داهێزرانێ كر ؟ به‌ره‌یێ مقاومه‌، ئیران یان سووریا بوو ؟

سه‌رۆك بارزانى : هه‌موویان پشكدارى د داهێزرانا له‌شكه‌رێ ئه‌مریكادا كر، ئیران، سووریا، تیرۆر و مقاومه‌ژى بوو، ئه‌ڤجا هه‌موویان پشكدارى كر.

شه‌رق ئه‌لئه‌وسه‌ت: رژێما سووریا دترسیا كو ببیته‌ ئارمانجا دووڤدا ؟

سه‌رۆك بارزانى : ئێكسه‌ر پشتى ژناڤچوونا رژێمێ، ئیرانى و سورى هند دترسییان كو وه‌سا هزر دكر كی ژ وان دێ ل ده‌ستپێكێ بیته‌ ئارمانجا پشتى ژناڤچوونا رژێما به‌عس، ئه‌رێ ئیران ل رێزا ئێكێ یه‌ یان سووریا ؟

شه‌رق ئه‌لئه‌وسه‌ت : كه‌نگى دووماهیك جار بوو چاڤێ ته‌ ب سه‌دام حسێنى كه‌ڤتى ؟

سه‌رۆك بارزانى : ره‌نگه‌ ل 1996ێ بیت.

شه‌رق ئه‌لئه‌وسه‌ت : ئه‌و دیداره‌ یا چه‌وا بوو؟

سه‌رۆك بارزانى: دیداره‌كا باش بوو.

شه‌رق ئه‌لئه‌وسه‌ت : وى ده‌مى عیراق یا دوورپێچ كرى بوو ؟

سه‌رۆك بارزانى : به‌لێ.

شه‌رق ئه‌لئه‌وسه‌ت : ده‌مێ وه‌ هێرشى هه‌ولێرێ كرى و داخوازا هاریكارییێ ژ سه‌دام حسێنى كرى، چ ساله‌ك بوو؟

سه‌رۆك بارزانى : ل 1996ێ بوو.

شه‌رق ئه‌لئه‌وسه‌ت : پشتى وه‌ داخوازا هاریكارییێ ژێ كرى، سه‌ره‌دانا وه‌ كر؟ هاریكارى پێشكێشكر؟

شه‌رق ئه‌لئه‌وسه‌ت : به‌لێ هاریكارى پێشكێشكر، هه‌لبه‌ت هاریكارییێن وى پشتى ده‌ستێوه‌ردانا ئیرانێ هاتن، ل ده‌ستپێكێ ئیرانى هاتن، ئه‌وژى به‌رسڤه‌ك بوو بۆ ده‌ستێوه‌ردانا ئیرانێ.

شه‌رق ئه‌لئه‌وسه‌ت: ئه‌رێ ته‌ سه‌دام ل زیندانێ نه‌دیت، ته‌ بزاڤ نه‌كر چاڤێن ته‌ ڤێ بكه‌ڤن ؟

سه‌رۆك بارزانى : من نه‌دیت و بزاڤ ژى نه‌كر، مه‌ نه‌دڤییا ل زیندانێ ببینم.

شه‌رق ئه‌لئه‌وسه‌ت : ب وێ ره‌وشا سه‌دامى یێ دلخۆش نه‌بووى كو دوژمنه‌كێ كه‌ڤن بوو؟

سه‌رۆك بارزانى : دلخۆش بوون ب ڤى جۆرى د سیفه‌تێن زه‌لاماندا نینه‌، نه‌ مه‌ ده‌سته‌سه‌ركر و نه‌ مه‌ ژناڤبر، ئه‌مریكى هاتن و ژناڤبر، دلخۆش بوون ب ڤى جۆرى سیفه‌ته‌كا پاقژ نینه‌