سوودانى بۆ سعودییێ : ده‌رگه‌هێ به‌غدا بۆ ریازێ د هه‌موو كه‌رتاندا یێ ڤه‌كرییه‌

سه‌رۆكوه‌زیرێن عیراقێ پێشوازى ل وه‌زیرێ بازرگانییا سعوودییێ كر و دووپاتى ل هندێ كر، به‌غدا بۆ ریازێ د هه‌موو كه‌رتێن جۆدا دا و پێشڤه‌برنا په‌یوه‌ندییێن دوو قۆلى یا ڤه‌كرییه‌.

نڤیسینگه‌ها راگه‌هاندنا سه‌رۆكوه‌زیرێن عیراقێ راگه‌هاند، محه‌مه‌د شیاع سوودانى پێشوازى ل ماجد ئه‌لقه‌سبى وه‌زیرێ بازرگانییا سعوودییێ و شاندێ دگه‌لدا كر، د دیدارێدا پێداچوون بۆ هاریكارییێن دناڤبه‌را هه‌ردوو وه‌لاتاندا و پێشڤه‌برنا په‌یوه‌ندییێن دوو قۆلى بۆ به‌رژه‌وه‌ندییا هه‌ردوو وه‌لاتان هاته‌ كرن.

سوودانى دووپاتى ل وێ چه‌ندێ كر، ده‌رفه‌ت بۆ پێشڤه‌برنا هه‌ڤپشك دگه‌ل سعوودیه‌ د كه‌رتێن جۆدا دا ب تایبه‌ت ئه‌وێن په‌یوه‌ندى ب لایه‌نێن ئابوورى و وه‌به‌رهێنانێڤه‌ هه‌ی و هاریكارى دبوارێ وزه‌یێدا و رووبرووبوونا كارتێكرنێن گوهۆرینێن سه‌قایى و بزاڤكرن بۆ كێمكرنا گرژییێن ده‌ڤه‌رێ هه‌یه‌.

دراگه‌هاندنێدا هاتییه‌ ژى، ماجد ئه‌لقه‌سه‌بى وه‌زیرێ بازرگانییا سعوودییێ دووپات كر، به‌رده‌وامبوونا كارى ژ چارچووڤێ جڤاتا هه‌ماهه‌نگییا دناڤبه‌را عیراق و سعوودییێدا، هاریكارییا هه‌ردوو وه‌لاتان د بوارێن ئابوورى و وه‌به‌رهێنانێ و گه‌شتیارى و ئێمناهییێدا و بوارێن دى ب خۆڤه‌دگریت.