د. محه‌مه‌د شوكری: هەولێر دێ بیته‌ سەنتەره‌ک بۆ خواندنا بریتانی ل هەموو رۆژهەلاتا ناڤین

 ئاژنسا خانی ” تایبه‌ت:

سەرۆکێ دەستەیا وەبەرهێنانێ ل هەرێما کوردستانێ دیار كر، زانکۆیا بریتانیا بریار دایە تایه‌كێ وێ زانکۆیێ ل هەولێرێ ڤه‌كه‌ت، ئه‌ڤ چه‌نده‌ دێ بیته‌ سه‌نته‌رێ ئێكێ یێ زانکۆیا بریتانیا ل رۆژهەلاتا ناڤین و ل سالا 2023 _ 2024 ێ” ئه‌و زانكۆیه‌ دێ قوتابییان وه‌رگریت و خواندن ل وێ زانكۆیێ دێ ده‌ستپێكه‌ت و سالانه‌ دێ 10 زه‌مالێن خواندنێ ل هه‌رێما كوردستانی بێ به‌رامبه‌ر وه‌رگریت.

د. محەمەد شوکری زێده‌تر بۆ ئاژانسا خانی دیار كر: مه‌ره‌ما سەرەکی یا سه‌رۆكێ حكومه‌تا هه‌رێما كوردستانی و سەره‌دانا شاندێ هەرێما کوردستانێ بۆ لەندەن پشداریکرن بوو” د وێ ئاهەنگێ دا کو ل بارەگه‌هێ سەرەکی یێ زانکۆیا لەندەن هاتبوو رێکخستن بۆ ڕاگەهاندنا ڤه‌کرنا زانکۆیا بریتانی ل هەولێرێ، كو دێ بەرنامێن زانکۆیا لەندەن بجهـ ئینیت و دێ زەمالەیا خواندنێ بۆ ١٠ کەسێن هەرێمێ بێ به‌رامبه‌ر د بیاڤێن جۆدا دابین كه‌ت” كو مه‌رج تێدا هه‌بیت بۆ هندێ ل لەندەن بخوینن و ئەڤ بەرنامە یێ سالانه‌یه‌” هه‌روه‌سا ڕاگەهاندنا ڤه‌كۆلینێن زانستی ده‌ربارەیی هەرێما کوردستانێ دێ ب رێیا وێ زانکۆیێ بیت‌ و دێ ب كۆژمێ 10 ملیۆن پاوەندێن بریتانی بیت، ئەڤه‌ هه‌موو د وێ ئاهه‌نگێ دا هاتینه‌ به‌حس کرن، كو چه‌ندین كه‌سێن ئەکادیمی و سیاسی و پەرلەمانتار تێدا پشكدار ببوون.

ناڤهاتی گۆت ژی: ”دابینکرنا زەمالەیا خواندنێ بۆ هەرێما کوردستانێ دێ کاریگەرییه‌كا زۆر باش هه‌بیت و ئه‌م ل گه‌ل سەرۆکێ جڤاتا کاری عێراقی- بریتانی روونشتینه‌ و مه‌ سەره‌دانا پەرلەمانتارێن بریتانیا کرییه‌ و مه‌ دانوستاندن كرینه‌ و مه‌ به‌حسێ هندێ كر ل هه‌یڤا شەش یا ئەڤ ساله‌ دێ کۆنفرانسه‌كێ تایبەت یێ ئابووری دناڤبه‌را هەرێما کوردستانێ و بریتانیا و عێراقێ دا هێته‌ ئه‌نجامدان، مه‌ به‌حس ل هندێ ژی كرییه‌ كانێ دێ چاوا شێین کارێ بازرگانی و وەبەرهێنانێ زێده‌تر لێ کەین” كو پشته‌ڤانییا کەرتێ خواندنێ و ساخله‌مییێ بهێته‌ كرن.

سەرۆکێ دەستەیا وەبەرهێنانێ ل هەرێما کوردستانێ گۆت ژی: ‘ڤه‌کرنا تایێ زانکۆیا لەندەن ل هەولێرێ دێ بیته‌ ده‌رگه‌هه‌ك بۆ هەموو ڕۆژهەلاتا ناڤین، چونکی تایێن وێ زانکۆیێ ل هیندستانێ و سەنگافۆرە و ل هەولێرێ ژی هاتینه‌ ڤه‌کرن، هەولێر دێ بیته‌ سەنتەره‌ک بۆ خواندنا بریتانی ل هەموو رۆژهەلاتا ناڤین و كو قوتابی یێن كوردستانێ و عیراقێ و دڤه‌رێن دیتر دشێن ل هەولێرێ درێژییێ ب خواندنا خۆ بدەن.”